«Կարծում եմ` Վարդան Այվազյանը չի ընկալել իմ նախաձեռնության իմաստը և օրիգինալ երևալու համար այսպիսի սիրողական պատասխան է տվել»,-Aravot.am-ի հետ զրույցում «Ժառանգություն» խմբակցության ղեկավար Ռուբեն Հակոբյանն այսպես պատասխանեց ՀՀԿ խմբակցության պատգամավոր Վարդան Այվազյանին:
Հիշեցնենք, որ ԱԺ «Ժառանգության» խմբակցության ղեկավար Ռուբեն Հակոբյանը պատրաստվում է նախաձեռնությամբ հանդես գալ`«ԱԺ կանոնակարգ» օրենքում փոփոխություններ կատարելու և քառօրյա նիստերի փոխարեն եռօրյա նիստեր անցկացնելու վերաբերյալ: Իսկ Վարդան Այվազյանն այս կապակցությամբ գործընկերոջ առաջարկին այսպես էր արձագանքել. «Հիմա Ռուբեն Հակոբյանը հոգնում ա, ես չեմ հոգնում` առավոտից իրիկուն աշխատում եմ, չեմ հոգնում, սաղ օրն էլ աշխատանքի եմ: Դրա համար ինձ համար տարբերություն չկա` Ազգային ժողովի իմ կաբինետում կաշխատե՞մ, թե՞ նիստերի դահլիճում»:
Պարոն Հակոբյանը Վարդան Այվազյանի և մյուսների համար մանրամասնեց իր նախաձեռնության իմաստը. «Նախ՝ քառօրյա նիստերը դառնում են եռօրյա, բայց միաժամանակ լիագումար նիստերի արանքում երկշաբաթյա ընդմիջումը դառնում է մեկ շաբաթ: Այլ խոսքով` նստաշրջանների կտրվածքով ավելանում է լիագումար նիստերի, հայտարարությունների, հարցուպատասխանների և ճեպազրույցների քանակը: Եթե Վարդան Այվազյանը հետևի մոնիտորինգին, կտեսնի, որ հինգշաբթի օրերը մենք տրցակներով օրենքներ ենք քննարկում առանց ելույթների, ինչպես երկուշաբթի և երեքշաբթի»:
Հղում անելով ՀՀ Սահմանադրության 65-րդ հոդվածին` Ռուբեն Հակոբյանը նշում է, որ իր առաջարկն ապահովում է խորհրդարանական գործունեության ռիթմ, ինչը կնպաստի խորհրդարանի` առավել պրոֆեսիոնալ դառնալուն:
Կարդացեք նաև
Անդրադառնալով Վարդան Այվազյանի`«առավոտից իրիկուն աշխատելու» մասին դիտարկումներին` պարոն Հակոբյանը նշեց. «Եթե Վարդան Այվազյանի տարերքը իրոք խորհրդարանական գործունեությամբ լուրջ զբաղվելն է, ինչպես ինքն է հայտարարում, ապա նա առանց երկմտելու պիտի միանա այս նախաձեռնությանը»:
Հետաքրքրվեցինք` ի՞նչ փուլում է գտնվում նախագիծը: Պարոն Հակոբյանը պատասխանեց. «Նախագիծն ամբողջությամբ պատրաստ է, և ես այս պահին խորհրդակցում եմ մյուս խմբակցությունների ներկայացուցիչների հետ ու կցանկանայի, որ նախագիծը քննարկվեր կամ ընդունվեր համաձայնության մթնոլորտում»:
Մեր մյուս հարցին` Վարդան Այվազյանի ցուցաբերած դիմադրության պատճառը իրոք, ինչպես Ռուբեն Հակոբյանն է կարծում, նրա` նախաձեռնության իմաստը չընկալե՞լն է, թե՞ այլ միտում կա, պարոն Հակոբյանն այսպես պատասխանեց. «Այլ միտում չեմ տեսնում, ուղղակի նա խորությամբ չի ընկալել առաջարկության իմաստը: Արդեն իմ խոսքից հետո նա կընկալի նախաձեռնության նպատակը»:
Տաթև ՀԱՐՈՒԹՅՈՒՆՅԱՆ
