«Մաքսային միությանն անդամակցությունը բարդ գործընթաց է. Ռուսաստանի հետ պետք է համաձայնեցվի և կնքվի մոտ 120 պայմանագիր»,- այսօր խորհրդարանում լրագրողների հետ զրույցում նման կարծիք հայտնեց ՀՀ էներգետիկայի և բնական պաշարների նախարար Արմեն Մովսիսյանը։
Նախարարն ասաց, որ կառավարությունում օրուգիշեր աշխատում են, որպեսզի հնարավորության սահմաններում այդ գործընթացն արագ լինի: Բայց կոնկրետ ժամկետներ դժվարացավ նշել։
Հարցին` Մաքսային միությանն անդամակցությունը մեծապես կախվա՞ծ է գազի գնի հետ, Արմեն Մովսիսյանն ասաց, որ մենք պետք է ընդհանրապես ճիշտ գնահատենք մեր տնտեսությունը՝ ի՞նչ արտադրանք կարող ենք տալ, ինչպիսի՞ շուկայում կարող է մեր արտադրանքը մրցունակ լինել, ո՞ր տրանսպորտային ճանապարհներից օգտվելով կարող ենք այդ արտադրանքը մրցունակ գնով հասցնել շուկա։ «Եթե քննարկենք այս ամենն, ապա կտեսնենք, որ գազը չէ, որ էականն է»,- նշեց նախարարը՝ հավելելով, որ հայկական արտադրանքի արտահանման առումով լավագույնն առաջիկա քսան տարիների համար ռուսական շուկան է։
Նելլի ԳՐԻԳՈՐՅԱՆ
