«Տիգրան Ներսիսյանի անունը մեծ պատիվ է բերում ցանկացած կառույցի, որը չի պատկանում Առաքելական եկեղեցուն, սակայն ինձ զարմացնում է այդ կառույցների առաջնորդների լռությունը, ովքեր չեն հայտարարում, որ Տիգրան Ներսիսյանն իրենցից մեկը չէ»,-այսօր այս մասին «Ազդակ» մամուլի ակումբում` անդրադառնալով աղանդավորական շարժման մեջ ներգրավվածությանը, ասաց Գ. Սունդուկյանի անվան ազգային ակադեմիական թատրոնի դերասան Տիգրան Ներսիսյանը:
Օրեր առաջ Միացյալ Երիտասարդական Լիգա անվանմամբ կազմակերպությունը համացանցում մի ցուցակ է հրապարակել, որում, որպես «աղանդավորներ» ներառվել են մի շարք հայտնի մարդիկ: Տիգրան Ներսիսյանը այդ ցուցակում ներառված հայտնիներից մեկն էր, որը հանդես եկավ տվյալ հայտարարության հերքումով:
«Ես հայտարարում եմ, որ դա կեղծիք է, ակնհայտ սուտ եւ ապատեղեկատվություն, բացահայտ կեղծիք, բացահայտ սուտ: Ես արագ արձագանքեցի դրան` ակնկալելով, որպեսզի այդ Միացյալ Երիտասարդական Լիգան, բնականաբար, իր քայլը անի, եւ իր կեղծիքը, իր ստի հերքումով ներկայանա»,-ասաց արտիստը` հավելելով, որ հայտարարությունից հետո մյուս օրը առավոտյան Նելլին (կինը – խմբ.) զրուցել է Լիգայի համանախագահի հետ` հերքում տպելու նպատակով եւ վերջիններս պատասխանել են, որ օրվա ընթացքում, օրը անցնի, իրենք հերքումով կներկայանան եւ ներողություն կխնդրեն, որն այդպես էլ տեղի չի ունեցել:
Արտիստը նաեւ ընթերցեց Միացյալ Երիտասարդական Լիգային ուղղված իր հայտարարությունը, որում ցուցակը կազմողներին անվանեց ստախոս եւ անբարո:
Կարդացեք նաև
Դերասանի խոսքով, նա, ինչպես եւ իր կինը` Հայաստանի վաստակավոր արտիստուհի Նելլի Խերանյանը հարում է Հայ Առաքելական եկեղեցուն, որում եւ մկրտվել է:
Դերասանն անդրադառնալով համացանցում տարածում գտած հոդվածներից մեկին, որում ասվում է, թե այն մեքենան, որը նա վարում է, իրեն նվիրել է «Կյանքի խոսք» կրոնական կազմակերպության ղեկավար Արթուր Սիմոնյանը, ում դերասանը, իր իսկ խոսքով, նույնիսկ չի էլ տեսել` նշելով, որ որեւէ աղանդավորական շարժմանը հարելու դեպքում չէր թաքցնի, թե ինչ կազմակերպության անդամ է եւ ուր է գնում:
Նա չի պատրաստվում որեւէ դատական գործընթաց սկսել Միացյալ Երիտասարդական Լիգայի դեմ, քանի որ հավատում է մարդկանց, եւ հավատում է, որ նրանք կսթափվեն: Կազմակերպության այդ արարքը դերասանը որակեց որպես PR- արշավ:
Քրիստինա ՄԻՐԶՈՅԱՆ
