Այսօր խորհրդարանում հանքարդյունաբերության ոլորտին վերաբերվող լսումների ժամանակ ԱԺ տնտեսական հարցերի մշտական հանձնաժողովի ՀԿԿ-ական նախագահ Վարդան Այվազյանը դժգոհություն հնչեցրեց, որ համայնքապետերը «փայ» են մտնում հանքերում:
Լսումների ավարտից հետո մի քանի լրագրողներ պարոն Այվազյանից հետաքրքրվեցին, թե ո՞ր համայնքապետերն են փորձել «փայ» մտնել հանքարդյունաբերության ոլորտում: «Ո՞ր համայնքն եք ուզում, Համզաչիմանը գիտե՞ք, մոտավորապես նայեք էդ ուղղություններով: Եթե կա օրենսդրական բաց, ապա գյուղապետը կարող է ասել՝ չեմ տրամադրում ձեզ հողը»,- պատասխանեց Այվազյանը: Հարցին, թե փաստորեն ոլորտում «փայ» մտելու նախադեպ կա՞, Վարդան Այվազյանը հարցով պատասխանեց. «Իսկ ի՞նչ է, դուք չէիք իմանում, որ «փայ» մտնելու նախադեպեր կային»:
Հստակեցնող հարցին, թե էլ ովքե՞ր կարող են փայ մտնել, նա պատասխանեց. «Ով որ ներդրում կարող է կատարել, մյուս պաշտոնյաները ուրիշ ձև չունեն «փայ» մտնելու»: Իսկ կաշառք վերցնելու տարբերակ ունե՞ն պաշտոնյաները, հարցին էլ Այվազյանը պատասխանեց. «Գիտեք ի՞նչ կա, ես ոչ մի բան էլ չեմ բացառում, նույն կերպ լրագրողն էլ կարող է մտածել՝ մի տաս անգամ վրեն գրում եմ, պետք է անպայման ինձ էսքան «փայ» տաք: «Փայ» մտնելը ես այսպես եմ մտածում, եթե որևէ մեկը բիզնեսի շահագործման մեջ փորձի մասնակցել, շատ ողջունելի կլինի»:
Նելլի ԳՐԻԳՈՐՅԱՆ
