Խորհրդարանում հանքարդյունաբերության խնդիրներին վերաբերվող լսումների ժամանակ ԱԺ տնտեսական հարցերի մշտական հանձնաժողովի նախագահ Վարդան Այվազյանը էներգետիկայի և բնական պաշարների նախարար Արմեն Մովսիսյանից հետաքրքրվեց, թե կառավարությունն ինչպե՞ս է պայքարում հանքարդյունաբերության մեջ «փայ մտնող» համայնքապետերի դեմ:
Վարդան Այվազյանն ասաց, որ բոլորին է հայտնի այն, որ ցանկացած համայնքի ղեկավար իր համայնքում իրականացվող հանքարդյունաբերության մեջ «փայ» է մտնում: Նա ասաց նաեւ, որ երբ համայնքների ղեկավարներն իմանում են, որ իրենց համայնքում հանքավայրերի ուսումնասիրություններ են կատարվելու, դրանից երկու օր առաջ հողը ձևակերպում են որպես համայնքային սեփականություն: Համայնքապետերին օրենքով նման լիազորություն տրված է:
Էներգետիկայի և բնական պաշարների նախարար Արմեն Մովսիսյանը չհերքեց, որ նման խնդիր կա: «Համայնքները բողոքում էին, որ իրենց հողերն են օգտագործում: Որոշեցինք ավելի լիբերալ լինել, համայնքներին տալ այդ լիազորությունները: Այժմ համայնքն է որոշում իր ավագանիով՝ այդ հանքարդյունաբերությունը կիրականացվի՞ իր համայնքում, թե ոչ: Բայց ստացվեց, որ այո, որոշ համայնքապետեր կոռուպցիոն մեխանիզմն են օգտագործում: Խնդիրները դինամիկ են, հետևաբար օրենսգիրքն էլ պետք է լինի դինամիկ և անընդհատ փոփոխությունների ենթարկվի»,- ասաց Արմեն Մովսիսյանը:
Վարդան Այվազյանի դժգոհությունը, սակայն, չփարատվեց: Նա շարունակեց. «Հիմա Քաջարանի կողքի համայնքը թույլ չի տալիս, որ շահագործեն Քաջարանի հանքավայրը»: Նա ասաց նաեւ, որ որոշ հանքերի շահագործման թույլտվություն առանց բնապահպանական ու երկրաբանական փորձաքննությունների է տրամադրվել, ինչը նման է նրան, որ մուկը ամբարից ցորեն գողանա:
Կարդացեք նաև
Նշենք, որ ըստ տարբեր հրապարակումների, Վարդան Այվազյանի հարազատների ու մտերիմների անունով գրանցված է 14 հանքավայր: Իսկ Ամերիկյան դատարանը Վարդան Այվազյանին մեղադրել է հանքարդյունաբերողներից կաշառք պահանջելու մեջ:
Նելլի ԳՐԻԳՈՐՅԱՆ
