Մեղադրվում է խարդախությամբ գումարներ յուրացնելու մեջ
Դիլիջան քաղաքի բնակչուհի, 1963թ. ծնված Սեդա Արարատի Քոչարյանին մեղադրանք է առաջադրվել այն բանի համար, որ նա 2008 թվականից մինչեւ 2013 թվականը Աննա Ապրեսյանին դրդել, համոզել է տարբեր անձանցից եւ կազմակերպություններից պարտքով վերցնել գումարներ եւ տալ իրեն, հետագայում հրաժարվել է դրանք վերադարձնել, սպառնալով վնասել Ա. Ապրեսյանին եւ նրա ընտանիքի անդամներին: Ըստ մեղադրանքի՝ դրա հետեւանքով Աննա Ապրեսյանը 2013թ. հունվարի 8-ին, ժամը 17-ի սահմաններում, Դիլիջան քաղաքի Մյասնիկյան փողոցում գտնվող քաղաքային գերեզմանատանը ծառից պարանով կախվելու միջոցով ինքնասպան է եղել:
Ըստ «Դատալեքս» տեղեկատվական կայքի, Սեդա Քոչարյանը մեղադրվում է նաեւ այն բանի համար, որ 2012թ. մարտ ամսից մինչեւ նույն տարվա սեպտեմբեր ամիսը Աննա Ապրեսյանի վստահությունը չարաշահելու միջոցով եւ խաբեությամբ, նրա միջոցով Արարատ Ալիխանյանից հափշտակել է 2 միլիոն դրամ: Սեդա Քոչարյանին մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 2-րդ կետով («Խարդախությունը, որ կատարվել է խոշոր չափերով): Սույն հոդվածով որակված գործողությունները պատժվում են տուգանքով՝ նվազագույն աշխատավարձի հինգհարյուրապատիկից հազարապատիկի չափով, կամ ազատազրկմամբ երկուսից հինգ տարի ժամկետով:
Նրա նկատմամբ խափանման միջոց է ընտրվել չհեռանալու մասին ստորագրությունը: Այս քրեական գործով դատավարությունը Տավուշի մարզի ընդհանուր իրավասության առաջին ատյանի դատարանի Իջեւանի նստավայրում մեկնարկելու է հոկտեմբերի 10-ին:
Կարդացեք նաև
Ոսկան ՍԱՐԳՍՅԱՆ
