Հայաստանում պղնձաձուլարան կառուցելու համար տարեկան կպահանջվի առնվազն 250 հազար տոննա պղնձի խտանյութի արտադրություն: Իսկ ներկայումս մոտ 130 հազար տոննա է արտադրվում: Իսկ տարեկան 250 հազար տոննա պղնձի խտանյութ կարելի է ստանալ 35 միլիոն տոննա հանքաքարի արդյունահանման դեպքում: Դրան Հայաստանում հնարավոր է հասնել առնվազն հինգ տարի հետո:
Այսօր խորհրդարանում ընթացող հանքարդյունաբերության խնդիրներին վերաբերվող լսումների ժամանակ ասաց ՀՀ էներգետիկայի եւ բնական պաշարների նախարար Արմեն Մովսիսյանը: Սակայն, ըստ նախարարի, Հայաստանում պղնձաձուլարանի կառուցումը պահանջում է համալիր խնդիրների լուծում. «Ծծումբի օգտագործման տեղը պետք է գտնել, սակայն տրանսպորտային ենթակառուցվածքները թույլ չեն տալիս: Պետք է կարողանալ ածանցյալ նյութերն օգտագործել: Պետք է քիմիական արդյունաբերություն լինի: Մի օր հասնելու ենք այդ քանակին, բայց այս հարցերը պետք է լուծել»:
Նախարարը նկատեց, որ այս ոլորտում հետագա ներդրումները մեծապես պայմանավորված են միջազգային շուկայում մետաղների գներից: Որոնք, ի դեպ, վերջին մեկ տարում բավական նվազել են:
Նելլի ԳՐԻԳՈՐՅԱՆ
