Այսօր «Մեդիա կենտրոնում» Պատերազմի եւ խաղաղության լուսաբանման ինստիտուտի հայաստանյան գրասենյակի նախաձեռնությամբ անցկացվեց քննարկում, որի թեման Վրաստանում անցկացվելիք նախագահական ընտրություններն էին:
Ռազմավարական եւ միջազգային հետազոտությունների վրացական հիմնադրամի ներկայացուցիչ Կախա Գոգոլաշվիլին իր խոսքում նշեց, թե «Ազգային շարժումը» շատ ցածր վարկանիշ ունի, ինչ վերաբերում է մամուլին, ապա ԶԼՄ-ները ազատ են դարձել` մասնավորապես նրանք, որոնք համարվում են իշխանամետ:
«Վրաստանի բարեփոխումների աջակիցներ» կազմակերպության աշխատակից Էլեն Խոշտարիան էլ ասաց, որ Վրաստանում նախագահական ընտրությունները ոչ միայն նախագահի ընտրություններ են, այլեւ` կառավարման համակարգի փոփոխության ընտրություններ. «Այսօր Վրաստանն իսկապես ունի հնարավորություն՝ ունենալու ուժեղ խորհրդարան, որը կնպաստի ժողովրդավարությանը Վրաստանում»,- ավելացրեց Էլեն Խոշտարիան:
Կախա Գոգոլաշվիլին ավելացրեց, որ ամենայն հավանականությամբ` ազգային փոքրամասնություններն իրենց ձայնը տալու են իշխող կուսակցությանը. «Նրանք այդ կերպ կվարվեն, հուսալով, որ իշխանության կողմից ավելի մեծ ուշադրության կարժանանան»:
Կարդացեք նաև
Էլեն Խոշտարիան գտնում է, որ վրացական հասարակությունը հակված է զգացմունքային որոշումների ու պոռթկումների. «Իսկ այսօր, ցավոք, ուժերի հարաբերակցության կտրուկ փոփոխություն կանխատեսել չես կարող»:
Եվա ՀԱԿՈԲՅԱՆ
