Այսօր «Հենարան» ակումբում համաներման թեմային անդրադարձավ Արդարադատության նախարարության նախարարի խորհրդական Նիկոլայ Առուստամյանը:
«Անկախության տարիներից ի վեր՝ այս համաներումը թվով իններորդն է, նպատակը` զուտ մարդասիրությունն է: Համաներման ակտն իր բնույթով ավելի լայն կիրառման շրջանակներ ունի, քան նախորդներն են եղել, այս անգամ այն արարքները, որոնց վրա չպետք է կիրառվեր համաներումը` դրանց վրա եւս տարածվում է»,- նշեց Նիկոլայ Առուստամյանը:
Համաներման համար բացառություն են կազմում մարդկության դեմ ուղղված հանցագործությունները, սեռական բնույթի եւ թմրամիջոցների վերաբերյալ հանցագործությունները:
Նիկոլայ Առուստամյանն ասաց, որ մոտ 500-600 հոգի պետք է ազատվի պատժից, 900-1000 հոգու պատժի չափը կկրճատվի:
Կարդացեք նաև
Նիկոլայ Առուստամյանն անդրադառնալով Տիգրան Առաքելյանի գործին՝ ասաց, որ ինքը անհատական որեւէ գործի վերաբերյալ տեղեկատվության չի տիրապետում, սակայն համաներման ակտը կարող է տարածվել մինչեւ վճռի հրապարակումը: Պատիժ նշանակելիս դատարանը կարող է կիրառել համաներման ակտը:
«Համաներման ակտը նորմատիվ իրավական ակտ է, եւ անկախ նրանից դատապարտյալը ինչ կամայականություն կցուցաբերի` այն կիրառվում է»,- ավելացրեց Նիկոլայ Առուստամյանը, շարունակելով, որ համաներումից դրական արդյունք է լինում, քանի որ պետության համար տնտեսական իմաստով շահավետ է լինում:
Նիկոլայ Առուստամյանը շեշտեց, որ անօրինական միջոցներով ոչ մեկը չի կարող համաներման ներկայացնել իր փաստաթղթերը, գումարի, ծանոթների միջոցով ոչինչ չի լինի, քանի որ խիստ վերահսկողություն է լինելու, եւ չնայած չի բացառվում փողով հարցեր լուծելու մտադրություններ լինեն, սակայն ըստ նրա` դա բացառված է:
Նիկոլայ Առուստամյանը տեղեկացրեց, որ համաներման գործընթացը սկսված է, արդեն այսօր ժամը 11:00-ից մարդկանց որոշ խումբ պատժից կազատվի:
Եվա ՀԱԿՈԲՅԱՆ
