Ստորջրյա լողի աշխարհի և Եվրոպայի բազմակի չեմպիոն Շավարշ Կարապետյանը, խոսելով երկուշաբթի օրը Սոչիի օլիմպիական կրակի մարելու մասին, ասել է, որ ամեն ինչ նորմալ է անցել և նման բան ամեն տեղ է պատահում:
«Ֆոնտանկա» պարբերականին պատմելով, թե ինչպես է եղել, որ կրակը հանգել է՝ հայազգի լողորդն ասել է. «Ես մտա Կրեմլ: Ինձ մոտեցավ հատուկ խումբը: Նրանք վառեցին ջահը ու ես վազեցի: Պետք էր վազել բավականին լուրջ տարածք, իսկ ջահը կշռում է մեկ կիլոգրամ 80 գրամ: Երկար վազքի համար դժվար է: Վազեցի մոտ երկու րոպե ու տեսնեմ կրակը հանգել է: Ես վազում էի կամարի տակով, իսկ այնտեղ քամի է: Դուրս եմ գալիս կամարից ու փչում է օդամղիչ խողովակը»:
Նա նշել է, որ նման դեպքերը արարողության ժամանակ հաշվի են առնված, և փոխանցումավազքի ժամանակ Օլիմպոսից բերած մի քանի ջահերով խումբը հերթապահում է:
«Ուղղակի այդ պահին մոտակայքում ոչ ոք չկար: Փոխանցեցին, որ հարկավոր է շտապ մոտենալ: Մոտեցան ու վառեցին իրենց կրակայրիչով: Դադարը մեկ րոպեից ավել չի տևել», – պատմում է Կարապետյանը՝ ենթադրելով, որ մոտակայքում մարդ չլինելու պատճառը եղել է Կրեմլի ներսում ձեռնարկված անվտանգության միջոցները: Օրինակ, Շավարշը իր հետ վազքի էր վերցրել 16-ամյա իր տղային, սակայն Կրեմլ նրան չեն թողել մտնել:
Կարդացեք նաև
«Այնտեղ այնպիսի անվտանգության համակարգ էր, այնպես էր ամեն ինչ փակված, որ ո՛չ որդուս, ո՛չ կնոջս, ոչ մի բարեկամի չկարողացա հետս տանել», – պատմել է Շավարշ Կարապետյանը, որը 1976թ. փրկել է Երևանյան լիճն ընկած տրոլեյբուսի 20 ուղևորների կյանքը:
Պատրաստեց Հովհաննես ԻՇԽԱՆՅԱՆԸ
