Aravot.am–ի ՀՀԿ Շիրակի մարզային կառույցի ղեկավար Սահակ Մինասյանին հարցրեց, թե որպես աշխարհ տեսած` եվրոպաներում շրջած ու նաև ռուսական մշակույթին քաջածանոթ անձնավորություն ինչպե՞ս կգնահատի Հայաստանի Մաքսային միությանն անդամագրվելը, մի՞թե դա է մեր երկրի զարգացման միակ ու ճիշտ ուղին: «Ես շատ պրիմիտիվ մեկնաբանություն եմ անելու, արտաքուստ պրիմիտիվ, ես դա համեմատում եմ հետևյալի հետ. եթե մարդուն հարցնես` դու բնակարան ես ուզում ունենալ` կահավորանքո՞վ, թե՞ բնակարան` առանց կահավորանքի, սառնարան լի՞քը, թե՞ դատարկ և այլն…Եվ Մաքսային միությունն է ուղիղ անհրաժեշտություն, և Եվրոպական ասոցացման խնդիրն է ուղիղ անհրաժեշտություն: Չի կարելի или-или, բազմիցս հնչեցվում է` «և , և» տեսակետը, բայց, ցավոք, կամ չի մեկնաբանվում իր ամբողջ խորությամբ, կամ ինձ չի հանդիպում նման մեկնաբանություններ: Բայց ես ինքս պատկերացնում եմ հետևյալը. Ռուսաստանի Դաշնության հետ մեր հարաբերությունները նախ մեր ցանկացած այսպես ասած եվրոպամետ կոչված անդամի, եթե հարցնեք, ինքն էլ չի պատկերացնում, որ կարող է մենք ՌԴ-ի հետ չունենանք հարաբերությունների առնվազն այն մակարդակը, ինչ ունենք այսօր: 2-րդ` նույն քաղաքացին չի կարող պատկերացնել, իհարկե, բանական, զարգացած, կարդացող քաղաքացու մասին է խոսքը, որ հնարավոր է այսօր ցանկացած զարգացում` առանց եվրոպական մնայուն երևելի արժեքներին ինտեգրվելու: Նշանակում է և կոշիկն է անհրաժեշտ, և վերարկուն, և հացն է անհրաժեշտ, և տանիքը: Չի կարելի սահմանագծեր տանել, ընդհակառակը էս ամենի մեջ, ոնց որ ընտանիքում, սովորական կենցաղավարության մեջ յուրաքանչյուր պահի համար պետք է ճիշտ գնահատել որն է արժեքավորը և ճիշտ ժամանակին անհրաժեշտը, որն է տվյալ պահին անհրաժեշտը, կարելի է դասել և կատարել հաջորդ փուլը: Բնականաբար առաջինը տանիքն է` պատերի ապահովվածությամբ, հետո` մյուս խնդիրները: Բայց երբ մենք գործ ունենք առանձին դեպքերում փոքրահասակ երեխայի հետ , նշանակում է առաջին հերթին դպրոցը, նոր բնակարանը` նույնիսկ», -ասաց մեր զրուցակիցը: Ըստ նրա, այստեղ քաղաքական ճիշտ մանևրման անհրաժեշտություն կա, որի հնարավոր կարևոր նախապայմանը մեր քաղաքական դաշտի միասնականությունն է:
«Գիտեք ես ընդունում, ողջունում եմ քաղաքական դաշտի ցանկացած վերաձևավորումներ`ընդդիմության, իշխանության դաշտի, երբ խոսքը վերաբերում է ներքին քաղաքականությանը: Նույնիսկ ինձ համար կարող է թեթև ծիծաղ առաջացնի մեր ԱԺ դահլիճում երկու պատգամավորի կամ պատգամավորի ու ինչ- որ իշխանավորի թեժ լեզվակռիվը, ես դա ուրախությամբ, ավելի հաճույքով կնայեմ, քան ցանկացած այլ հաղորդում: Եվ կուրախանամ որպես ձեռքբերում, բայց արտաքին քաղաքականության մասով, որի պատճառով մենք դարերով տուժել ենք, հարկ է, որ լինենք միասնական: Ես գիտեմ քաղաքական գործիչների, անձամբ ծանոթ եմ մարդկանց հետ, շատ լավ ճանաչում եմ, գիտեմ նրանց մտահորիզոնը, գաղափարախոսության հիմքերը և այլն, նրանք իրենց տանը կնոջը ողջունում են` պրիվետ լյուբիմայա, բայց թերթերը ողողում են հոդվածներով, որ մենք թողած եվրոպական մշակութային չգիտեմ ինչ արժեքները գնում ենք Մաքսային միություն: Ախր չի կարելի հանուն սեփական ինչ-որ արժեթղթերի աճի, խաղալ էնպիսի կարևոր արտաքին քաղաքականության էլմենտի հետ, ինչպիսին համարվում է ձեր առաջ քաշած հարցը»,- ասաց Սահակ Մինասյանը:
Aravot.am-ի այն դիտարկմանը, թե ձեր խոսքը արդյո՞ք հասանելի է եվրոպացիներին, նրանք կընկալեն, որ չպիտի փակվի Եվրոպայի դռները Հայաստանի առջև, ՀՀԿ կառույցի ղեկավարը համոզված ասաց. «Մենք` հայերս, էնքան բազմաշերտ կենցաղային կուլտուրա ունենք, որ ցանկացած նույնիսկ քաղաքական բարդ խնդիր կարելի է կենցաղային օրինակով մեկնաբանել, ինչպես փորձ արեցի նախորդին: Երբեմն, մեր բարեկամների էն հատվածը, որ ինչ- որ խնդիրներով մեզ հոգնեցրել է, զայրացրել է կամ չի գնում էն բարեկամական կենցաղավարման օրենքներով, որը մեզ է անհրաժեշտ, առիթ ենք փնտրում, որպեսզի հարաբերությունները խզենք: Իսկ էն բարեկամը, որից մենք այս կամ այն տեսակի կախում ունենք, որի մոտ կա էնպիսի արժեքային համակարգ, որը մեզ ձգում է, բոլոր սխալները ներում ենք: Մեր Հայաստանը շատ լավն է, մեր Հայաստանը բոլորին պետք է, և ոչ մի պետություն մեզ հետ հարաբերություններ չի խզի»:
Կարդացեք նաև
Նունե ԱՐԵՎՇԱՏՅԱՆ
