Այսօր Հայաստանում կան շուրջ 307 գյուղացիական կոոպերացիաներ, սակայն, թե դրանցից քանիսն են ռեալ աշխատում, հնարավոր չէ ասել: Այսօր գյուղատնտեսության նախարարությունում` գյուղատնտեսական կոոպերատիվների վերաբերյալ կազմակերպված քննարկման ժամանակ ասաց Ագրարային համալսարանի ագրոբիզնեսի եւ շուկայագիտության ֆակուլտետի դեկան Հրաչիկ Ջավադյանը:
Նրա խոսքերով, դեռեւս 1993 թվականից ստեղծվել են գյուղացիական կոոպերատիվներ, բայց քանի որ դրամաշնորհների հաշվին էին ստեղծվում եւ կոոպերատիվների գործունեության իրական սկզբունքը չէին պահպանում, դրանց մեծ մասը քայքայվեց:
Եղած ծավալի կոոպերատիվները շատ քիչ են, եւ Aravot.am-ի հարցին, թե ինչո՞ւ Հայաստանում չեն զարգանում գյուղացիական կոոպերատիվները, պարոն Ջավադյանն ըստ էության կոնկրետ չպատասխանեց, թեեւ նշեց, որ մի շարք խնդիրներ կան` սկսած մայր օրենքի բացակայությունից մինչեւ հարկային արտոնությունների բացակայությունը:
Մանրամասն` տեսանյութում
Այս քննարկմանը ներկա էր նաեւ տնտեսական գիտությունների թեկնածու, դոցենտ Վարդան Ուռուտյանը, որը բավականին երկար դասախոսություն կարդաց, թե ինչ են գյուղացիական կոոպերատիվներն ու աշխարհում դրանց դերը տնտեսության մեջ:
Քննարկմանը ներկա գյուղացիական կոոպերատիվների ներկայացուցիչներից մեկը՝ Շիրակի մարզի Աղին համայնքի կոոպերատիվի ղեկավարը համոզմունք հայտնեց, որ գյուղատնտեսության զարգացման լավագույն տարբերակներից մեկը հենց կոոպերատիվներն են, որոնց այս տարբերակով աշխատանքը կատարվում է շուկայականից բավականին ցածր գներով:
Այս կոոպերատիվի ներկայացուցիչն ասաց, որ կառավարությունը 50% ներդրում է կատարել կոոպերատիվի ստեղծման գործում, 30%-ը դրսի դրամաշնորհներն են, իսկ 20% մասնակցությունը կոոպերատիվի անդամներն են: Աղին համայնքի ներկայացուցիչն ասաց, որ պետական աջակցությունը պարտադիր է:
Իսկ Վարդան Ուռուտյանն էլ ավելացրեց, որ պետք չէ հույսները դնել միայն դրամաշնորհների վրա, քանի որ դրա ավարտից հետո ծրագիրը մնում է թղթի վրա, ուստի պետք է գործարար ծրագիր կազմել, որպեսզի կոոպերատիվի անդամները հստակ իմանան, թե հետագայում ինչ պետք է արվի:
Քննարկման ժամանակ նաեւ կարծիք հնչեց, որ շատ գյուղացիներ կոոպերատիվը նույնացնում են կոլխոզի կամ սովխոզի հետ, սակայն իրականում այդպես չէ, պարզապես գյուղացիներին պետք է ճիշտ բացատրել դրա կարեւորությունն ու անհրաժեշտությունն ի շահ իրենց:
Նելլի ԲԱԲԱՅԱՆ
