Այսօր Վերաքննիչ քրեական դատարանում ՀԱԿ ակտիվիստ Տիգրան Առաքելյանի դատական նիստից հետո դահլիճում ներկա մի խումբ կանայք մեղադրող դատախազ Հակոբ Մարտիրոսյանին անհարմար իրավիճակի մեջ դրեցին:
Նա նիստի ընթացքում առարկություն ներկայացրեց Տիգրան Առաքելյանի ներկայացրած միջնորդությանը, եւ կանայք դրա պատասխանը տվեցին նիստից հետո՝ իրենց միջոցներով: «Ամոթ քեզ, դու մա՞րդ ես, դու ընտանիք, երեխաներ ունե՞ս, խիղճ ունե՞ս, նման սուտ ես խոսում: Մի քիչ էլ սպասի, քո տեղը ստեղ ա լինելու»:
Դատախազին հորդորեցին՝ թե կարող ես, ժողովրդի միջով դուրս արի, ոչ թե հետնամուտքով: Նրան անվանում էին «թուրք, մուսուլման»:
Կանանցից մեկի խոսքերով՝ «Զիմզիմովի դատավարությունն է՝ գնա-արի, գնա-արի: Լիսկայինը ասում են՝ քնած էր, ըսենց էր, ընենց էր, խոսքը խոսքին սկի չէր բռնում, բայց երեխուն ինչ ձեւով են բերում-տանում (նկատի ունի Տիգրան Առաքելյանին, որին ձեռնաշղթաներով են բերում ու տանում,- Հ. Ջ.)»:
Կարդացեք նաև
Դահլիճում ներկաները վստահեցնում էին, որ դատարանը սպասում է վերեւներից հրամանների, մինչեւ հրամանը չստանան, պետք է այսպես ձգձգեն:
Հիշեցնենք, որ այսօր դատական նիստի ընթացքում պաշտպան Մուշեղ Շուշանյանը պատրաստվում էր նորից միջնորդություն ներկայացնել Տիգրան Առաքելյանի խափանման միջոցը փոխելու, սակայն դատավոր Եվա Դարբինյանը ընդհատեց դատական նիստը:
Հռիփսիմե ՋԵԲԵՋՅԱՆ
