Դատախազության կայքէջի տեղեկատու բաժնում բացակայում են գլխավոր դատախազի առաջին օգնական Սիրեկան Պետրոսյանի ու խորհրդական, գիտությունների դոկտոր Հովհաննես Ստեփանյանի անունները: «Խորհրդականի, օգնականի պաշտոնները հայեցողական են եւ տրամաբանական է, որ յուրաքանչյուր պաշտոնյա պետք է ձեւավորի իր փոքր աշխատակազմը: Երկրորդ, Ձեր կողմից հիշատակված անձինք աշխատանքից ազատվել են նախքան նոր գլխավոր դատախազի նշանակումը, սակայն բացառված չէ, որ առաջիկայում եւս լինեն նոր կադրային փոփոխություններ, այդ թվում՝ հայեցողական պաշտոններում: Արտառոց ոչինչ չկա, ավելին` շատ տրամաբանական է», – մեկնաբանելով նշված երկու անձանց աշխատանքից ազատվելը՝ ասաց ՀՀ գլխավոր դատախազի խորհրդական Սոնա Տռուզյանը։
Մեր զրուցակիցը հավաստիացրեց, որ կադրային փոփոխությունների դեպքում ԶԼՄ-ները պատշաճ կիրազեկվեն։ «Կադրային փոփոխությունների մասին դատախազությունը մշտապես պատշաճ ծանուցել է։ Կանխատեսումների կարիք չկա, ողջամիտ ժամկետներում ԶԼՄ-ները կիրազեկվեն»,- ասաց Ս.Տռուզյանը:
Ի դեպ, Սոնա Տռուզյանը գտնվում է արձակուրդում եւ մի քանի օրից կբացակայի հանրապետությունից: «Վաղուց ծրագրված ուղեւորություն էր»,-ասում է նա:
