Ինչպես տեղեկացրել ենք, ոստիկանության Կապանի քննչական բաժնում նախապատրաստվում են նյութեր «Դինո Գոլդ Մայնինգ Քամփնի» ՓԲ ընկերության խորհրդի նախկին նախագահ Ռոբերտ Ֆալետտայի եւ նրա կնոջ՝ Ֆարիդա Ֆալետտայի գործով: ԱՄՆ քաղաքացիները, ըստ ոստիկանությունում առկա հաղորդման, զրկվել էին ձեռնարկատիրական գործունեությունից եւ անցյալ տարվա հունվարի 26-ին նրանց նկատմամբ կիրառված սպառնալիքների արդյունքում զրկվելով կապի, համակարգիչներից օգտվելու, ազատ շարժվելու իրավունքից, նրանք լքել էին երկիրը: Ֆալետտաները ոստիկանությունում հայտնել էին, որ իրենց համար նախօրոք ամրագրված չվերթով, հանցագործ գործողությունների շնորհիվ իրենք լքել էին հանրապետության տարածքը, Երեւանից մեկնել Մոսկվա, ապա՝ ԱՄՆ:
Aravot.am-ին տված հարցազրույցի ժամանակ Ֆալետտաները հրապարակել էին նաեւ նշված ընկերության գլխավոր օպերացիոն տնօրեն Ռիկ Հաուզի նամակը՝ անցյալ տարվա հունվարի 26-ից Ֆալետաների հետ աշխատանքային պայմանագրի խզման կապակցությամբ: Այս նամակում ասվել էր. «Ակնկալվում է խստորեն ապահովել սույն գրության, նաեւ մեր խոսակցության բովանդակության գաղտնիությունը, չհայտնել այն Կապանի համայնքի անդամներին կամ ՀՀ կառավարության պաշտոնյաներին: Հիշեցնում ենք, որ դուք նման պարտավորվածություն ունեք՝ համաձայն գաղտնիության պահպանման համաձայնագրի, որի պատճենը կցված է: Ձեզ կտրամադրվի բավարար ժամանակ՝ Ձեր անձնական իրերը բնակարանից հավաքելու, Ռուսաստան մեկնելու համար: Կտրամադրվի մեքենա Երեւան փոխադրվելու համար, որտեղ կմնաք մեկ գիշեր հյուրանոցում եւ հաջորդ օրը առավոտյան կմեկնեք Հայաստանից»: Ինչպես Aravot.am-ին հայտնեց Ֆալետտաների ներկայացուցիչ, ՀՀ փաստաբանների պալատի անդամ Լիանա Գրիգորյանը, գործը տեղափոխվել է Ազգային անվտանգության ծառայության քննչական վարչություն, վարույթը գտնվում է քննիչ Արթուր Աղաջանյանի վարույթում: Նախկին նախագահը եւ կինը բացատրություն էին տվել Կապանի ոստիկանության քննչական բաժնում, նրանք ներկայումս գտնվում են Հայաստանում եւ առայժմ ԱԱԾ չեն հրավիրվել:
Ռուզան ՄԻՆԱՍՅԱՆ
