Իրավաբանների ու հոգեբանների միջազգային ասոցիացիա ՀԿ նախագահ Խաչատուր Մարոզյանի համար համաներումը երկար սպասված է, բայց դատական ոլորտի խնդիրները համաներմամբ չեն լուծվում:
«Փոխանակ խնդիրը արմատախիլ անենք, բուժենք էդ մարդկանց, լուծում ենք ածանցյալ խնդիրներ: Թվաքանակի խնդիր ենք լուծում, մինչդեռ իրականում ազատազրկման վայրերում մարդիկ ոչ թե փոխվում են, այլ հակառակը՝ այնտեղի փոշին հետները դուրս բերելով՝ նրանց արժեհամակարգը խեղաթյուրվում է եւ այլ ճանապարհ չի մնում, քան լքել երկիրը կամ կրկնահանցագործ դառնալ»,- այսօր «Զարկերակ» ակումբում ասաց Մարոզյանը:
Նա դժգոհեց նաեւ արդարադատության ոլորտից. «Կան դեպքեր, երբ արդարացման դատավճռի փոխարեն անձին ազատազրկման են դատապարտում: Այն անձը, որը 50 կգ մետաղ է գողացել ու բանտախցում պետք է նստի հինգ անգամ նստած մեկի հետ, ով ում ինչ պետք է սովորեցնի: Եվ հիմա համաներմամբ դուրս եկած այդ անձը կկարողանա՞ զերծ մնալ կրկնահանցագործությունից կամ ի՞նչ պետք սերմանի հասարակության մեջ»:
Մարոզյանը չունի ուսումնասիրություն կրկնահանցագործությունների վերաբերյալ, բայց պնդում է՝ դրանց թիվը աճում է. «Մարդակործան համակարգ է արդարադատության համակարգը… մարդիկ բոլորը, բողոքում են անարդարացի դատավճիռներից»:
Կարդացեք նաև
Վերջում էլ հոգեբանը եզրահանգեց՝ համաներումը որեւէ արդյունք չի տալիս. «Հակառակը՝ պետք է սխալ չդատել, արդարացի դատավճիռներ արձակել, եթե հնարավոր է ներել ու այլ պատժամիջոցներ նշանակել»:
ՀՀ փաստաբանների միության անդամ, փաստաբան Հայկ Եգանյանն էլ կարծում է, որ համաներումը ոչ թե վերեւի հրահանգ պետք է լինի, այլ հասարակության պահանջ. «Այդ հինգ կամ վեց հարյուր հոգին, որ համաներման կիրառմամբ կարող են դուրս գալ, հնարավոր չէ տարանջատել սա արդար դատավճռի հիման վրա է, թե ոչ արդար: Համակարգը ե՞րբ կդառնա համակարգ, երբ ժողովուրդը դրան ձգտի»:
Արփինե ՍԻՄՈՆՅԱՆ
