«Ամերիկայի ձայն» ռադիոկայան. Աշխատանքային միգրանտների կողմից իրենց հայրենիքում մնացած ընտանիքներին հասցեագրված դրամական փոխանցումները շատ ավելի կարևոր են, քան օտարերկրյա օգնությունը:
Նման եզրակացություն է արվել Համաշխարհային բանկի կողմից հրապարակված նոր հետազոտության մեջ, որտեղ ներկայացված գնահատականների համաձայն աշխատանքային միգրանտների կողմից այս տարի կատարվող դրամական փոխանցումների ընդհանուր ծավալը կավելանա 6,3 տոկոսով:
Սպասվում է, որ այս տարի զարգացող երկրներից միգրանտներն իրենց հայրենիք կուղարկեն մոտ 414 միլիարդ դոլար, իսկ մինչև 2016 թվականն այս ցուցանիշը կարող է գերազանցել 500 միլիարդ դոլարը:
Այսպիսով, դրամական փոխանցումներից ստացվող միջոցները գրեթե չորս անգամ գերազանցում են օտարերկրյա պաշտոնական օգնության ծավալները, որը, ըստ ՄԱԿ-ի գնահատականների, տարեկան կազմում է մոտ 126 միլիարդ դոլար:
Կարդացեք նաև
Ներկայում աշխարհի բոլոր երկրներ, ներառյալ զարգացած երկրները, աշխատանքային միգրանտների կողմից փոխանցվող գումարների ծավալը կազմում է գրեթե 549 միլիարդ դոլար:
Աշխարհում միգրանտների կողմից փոխանցվող գումարների ստացողների հիմնական մասը բնակվում է Հնդկաստանում (71 միլիարդ դոլար), որին հետևում են Չինաստանը (60 միլիարդ դոլար), Ֆիլիպինները (26 միլիարդ դոլար), Մեքսիկան (22 միլիարդ դոլար), Նիգերիան (21 միլիարդ դոլար) և Եգիպտոսը (20 միլիարդ դոլար):
Որոշ պետությունների համար, ըստ Համաշխարհային բանկի հետազոտության, աշխատանքային միգրանտների կողմից իրենց հայրենիք ուղարկվող գումարները վճռական նշանակություն ունեն: Այսպես, Տաջիկստանում նման գումարները կազմում են ՀՆԱ-ի գրեթե կեսը, Ղրղզստանում այս ցուցանիշը կազմում է 31%, , Լեսոտոյում և Նեպալում՝ 25%, Մոլդովայում՝ 24%:
Համաշխարհային բանկի հետազոտությունը վկայում է այն մասին, որ դրամական փոխանցումների աճ է գրանցվում ամբողջ աշխարհում՝ բացառությամբ Լատինական Ամերիկայի և Կարիբյան ավազանի երկրների, որոնց վրա ազդեցություն է գործել ԱՄՆ-ում գրանցված տնտեսական անկումը:
