Կրթության եւ գիտության նախարարությունում ԿԳ նախարար Արմեն Աշոտյանը «Ուսուցչի օրվան» ընդառաջ պարգեւներ հանձնեց հանրապետության մի խումբ լավագույն ուսուցիչների:
2010 թվականից հոկտեմբերի 5-ը նշվում է որպես ուսուցչի մասնագիտական տոն: Ամեն տարի, Ուսուցչի օրվա նախաշեմին, կրթության և գիտության նախարարությունը կազմակերպում է «Տարվա լավագույն ուսուցիչ», «Տարվա լավագույն տնօրեն», «Տարվա լավագույն դաստիարակ» մրցույթները, որին այս տարի մասնակցել են 38 մանկավարժներ ՀՀ մարզերից և Երևանից:
Ավանդույթի համաձայն՝ արդյունքները եւ հաղթողների անունները կհրապարակվեն վաղը` Ուսուցչի օրը: Իսկ այսօր մանկավարժները մասնակցում էին ԿԳ նախարարի կազմակերպած ընդունելությանը, որի ժամանակ նրանց շնորհվեցին ոսկե հուշամեդալներ և պատվոգրեր: Շնորհավորելով մասնագիտական տոնի առթիվ` ԿԳ նախարար Արմեն Աշոտյանն իր երախտագիտությունը հայտնեց բոլոր մանկավարժներին անձնվեր աշխատանքի համար։
Ընդունելությանը ներկա էր «Յուքոմ» ընկերության գլխավոր տնօրեն Հայկ Եսայանը, որը Ուսուցչի օրվա առթիվ ԿԳ նախարարությունում մրցանակներ հանձնեց հանրապետության տասը լավագույն ուսուցիչներին: «Հանրապետության տասը լավագույն ուսուցիչներին մեր ընկերության կողմից նվիրում ենք հեռուստացույց եւ ցանկանում, որ այս փոքրիկ նվերով էլ ավելի ոգեւորվեք եւ լավ կրթեք մեր ապագա սերնդին»,-ասաց Եսայանը:
Կարդացեք նաև
ԿԳ նախարար Արմեն Աշոտյանն էլ նշեց, որ այս ընկերության հետ բազմաթիվ ծրագրեր են իրականացվել եւ ցանկություն հայտնեց, որ այս օրերին բազմաթիվ մասնավոր ընկերություններ իրենց երախտիքի խոսքը եւ ինչու չէ նաեւ նյութական աջակցությունը հայտնեին մանկավարժներին:
Այսպիսով՝ վաղը աշխարհի ավելի քան 100 երկրներում կնշվի Ուսուցչի միջազգային տոնը` որպես ուսուցչի եւ ողջ կրթական ոլորտի աշխատողների մասնագիտական տոն։ Մեզ մոտ ևս տոնական հիմնական միջոցառումը տեղի կունենա վաղը Ալ. Սպենդիարյանի անվան օպերայի եւ բալետի ազգային ակադեմիական թատրոնում: Վաստակաշատ մանկավարժներին կտրվեն պետական պարգևներ, վարչապետի հուշամեդալ և շնորհակալագրեր, իսկ «Տարվա լավագույն ուսուցչին» եւ «Տարվա լավագույն դաստիարակին» ՀՀ վարչապետի կողմից կտրվեն ավտոմեքենաներ։
Քրիստինա ՄԻՐԶՈՅԱՆ
