«Դուք տեսե՞լ եք, որ մենք հրաժարվենք արմատական փոփոխությունների պահանջից, որ ասենք, թե իշխանափոխություն չենք ուզում»,-այսպես պատասխանեց այսօր ԱԺ ճեպազրույցների ժամանակ ՀՅԴ խմբակցության պատգամավոր Աղվան Վարդանյանը 7or.am-ի լրագրողի հարցին՝ եթե Սերժ Սարգսյանը փոշմանի ու Վահան Հովհաննիսյանին չնշանակի Գերմանիայի դեսպան, նորից հրաժարական կպահանջե՞ք:
Պարոն Վարդանյանը նշեց, որ Վահան Հովհաննիսյանի նշանակման հարցը բազմիցս լուսաբանվել է, ինքը՝ Հովհաննիսյանն է ասուլիս տվել եւ պարզաբանել.«Կարծում եմ՝ ձեզնից շատերը գոհ կլինեին, եթե մեր բոլոր դեսպաններն ունենային Վահան Հովհաննիսյանի ունակությունները, կարողությունները… »:
Չթվարկենք բոլոր գովասանքները, որոնց արժանացրեց Աղվան Վարդանյանն իր կուսակից ընկերոջը, միայն հավելենք, որ նկատեց, թե «Այս նշանակումից կշահի մեր պետությունը, կտուժի՞ ՀՅԴ-ն, գուցե եւ տուժի, բայց կուսակցությունը գործում է երկրի եւ պետականության համար, մի կերպ կդիմանանք»:
Մելանյա ԲԱՐՍԵՂՅԱՆ
