«ՀՀ նախագահի հայտարարությունը` Մաքսային միությանը միանալու վերաբերյալ, հաճելի հայտարարություն չէր մեր ժողովրդի համար: Մենք չպետք է թողնենք միակողմանի զարգացման տարբերակը: Մենք պարտավոր ենք ժողովրդին զսպել ու հատկապես ռուսամոլ հատվածին ոգեւորության պահ չթողնել: ՀՀ իշխանությունը պարտավոր է ստեղծել մի վիճակ, որ մենք ճիշտ արդյունք ստանանք ու եղած իրավիճակում փորձենք այլընտրանքներ առաջացնել, որոնք չեն հակասի Ռուսաստանի շահերին»,- այսօր «Զարկերակ» ակումբում ասաց քաղաքագետ Լեւոն Շիրինյանը:
Լեւոն Շիրինյանը նշեց, որ այլընտրանք ասելով նկատի ունի կոնֆուցիական պետությունների շրջանակը, որն ըստ նրա` ահռելի տարածք է. «Այս երկրները փորձել են զարգանալ առանց օտարի միջամտության: Մենք նաեւ այս ճանապարհը պետք է անցնենք, որովհետեւ Եվրոպայի հետ գուցե բարդություններ ունենանք»:
Լեւոն Շիրինյանը գտնում է, որ անպայման պետք է մտածենք եւ աշխատենք, փորձենք, որ եթե այդ ուղղությունը վերցնում ենք, ապա՝ ճանապարհային երթուղիների այլընտրանք առաջացնել եւ վրացականի հույսին չմնալ. «Մեր ժողովրդի մեջ փակուղային իրավիճակ չպետք է առաջացնել, որ եթե ուզում էինք Եվրոպա եւ այն չստացվեց, ուրեմն վերջ…»:
Եվա ՀԱԿՈԲՅԱՆ
