Այսօր ԵԽԽՎ աշնանային նստաշրջանի լիագումար նիստում քննարկվում էր Եվրոպայի տարածքում գոյություն ունեցող հակամարտությունների պատճառով անհետ կորածների հարցը: Ելույթով հանդես եկավ Ադրբեջանի պատվիրակության անդամ Սահիբա Գաֆարովան, որը կրկին առաջ քաշեց այն ադրբեջանական թեզը, թե «Հայաստանը բռնազավթել է ադրբեջանական հողերի 20 տոկոսը»:
Նա մասնավորապես ասաց. «Ադրբեջանը ստիպված հակամարտության մեջ է մտել Հայաստանի հետ: Եվ քանի որ Հայաստանը բռնագրավել է ադրբեջանական տարածքի 20 տոկոսը, ապա մենք ավելի լավ ենք գիտակցում քննարկվող խնդրի կարևորությունը, քան այլք, որովհետև մինչև այժմ զգում ենք հակամարտության հետևանքները»:
Տեղեկացնելով, որ Ադրբեջանում ստեղծվել է Պատերազմի հետևանքով անհետ կորածների հարցերով զբաղվող պետական կոմիտե` ադրբեջանցի պատվիրակը որոշ տվյալներ ներկայացրեց այդ կոմիտեի կատարած ուսումնասիրություններից:
Մասնավորապես նշեց. «Կոմիտեն գրանցել է 4500 անհետ կորած ադրբեջանցիներ: Ըստ այդ ուսումնասիրությունների` 553 ադրբեջանցիներ Հայաստանում են մահացել տարբեր պատճառներով ` հիվանդություն, խոշտանգումներ: 877 ադրբեջանցիներ ապրում են բռնագրավված տարածքներում, բայց հայերն այդ փաստը չեն ընդունում: Գերությունից ազատագրված անձանց վերականգնողական աշխատանքները շատ դժվար են, նրանց դժվար է հաղթահարել խոշտանգումների մասին հիշողությունները: Հայաստանն ու Ադրբեջանը ստորագրել են հրադադարի համաձայնագիր, սակայն հայկական կողմի ոչ կառուցողական մոտեցումների պատճառով հակամարտությունը շարունակում է մնալ չլուծված»:
Կարդացեք նաև
Տաթև ՀԱՐՈՒԹՅՈՒՆՅԱՆ
