Հայաստանը օրեր առաջ դարձել է Միջազգային ոստիկանական ասոցիացիայի լիիրավ անդամ: Այս լուրը ոգեւորել է ասոցիացիայի Հայաստանի մասնաճյուղի նախագահ, գնդապետ Գրիշա Սարգսյանին: Նա վստահեցնում է` այսուհետեւ ավելի մեծ հնարավորություն կունենան պաշտպանելու աշխարհի տարբեր ծայրերում ապրող հայերի իրավունքները:
Միջազգային ոստիկանական ասոցիացիայի Դանիայում տեղի ունեցած գագաթաժողովից օրեր առաջ Հայաստան վերադարձած Սարգսյանն այսօր «Պոստ սկրիպտում» ակումբում պատմեց, որ Հայաստանի անդամակցությանը միաձայն քվեարկել է 64 անդամ պետություն:
Ըստ նրա, գագաթաժողովի օրակարգում կարեւոր հարցեր են եղել. «Օրինակ դեկլարացիա ընդունեցինք ` «աշխարհին խաղաղություն» . այս կոչն ուղարկելու ենք ՄԱԿ-ի գլխավոր քարտուղարին, որ ՄԱԿ-ում քննարկեն: Բավական է Սիրիայում արյուն թափվի: Բացի դրանից քննարկեցինք միջազգային ահաբեկչության դեմ պայքարի հարցը: Բելգիայի ներկայացուցիչը կարեւոր պլան էր մշակել` կոչվում էր կոբրա, այն լավ ուղեցույց էր, թե ինչպես պետք է ոստիկանությունը պայքարի ահաբեկչության դեմ ամբողջ աշխարհում»:
Պարոն Սարգսյանի խոսքով, գագաթաժողովում քննարկվել է նաեւ միջազգային ոստիկանական ասոցիացիայի համագործակցությունը արտակարգ իրավիճակներում, ինչպես նաեւ՝ անօթեւան ոստիկանների եւ նրանց երեխաների սոցիալական ապահովման հարցը:
Կարդացեք նաև
Պարոն Սարգսյանը նաեւ ասաց, որ իրենց ասոցիացիան մեծ դեր ունի նաեւ Հայաստանի համար. «Ի՞նչ է այս հզոր կառույցը տալիս Հայաստանին: Աշխարհի բոլոր հայկական գաղութներում պաշտպանելու է հայի իրավունքները: Մեր ասոցիացիայի ստորաբաժանումների միջոցով կարող ենք արտասահմանում գտնվող ամեն մի հայի իրավական եւ բարոյական օգնություն ցուցաբերել: Անգամ այն պետություններում, որտեղ Հայաստանը դիվանագիտական հարաբերություններ չունի, մենք այդտեղ կարող ենք հարցեր լուծել, իսկ Հայաստանի Հանրապետությունը չի կարող»:
Նա ասաց, որ հնարավորություն ունեն Սիրիայում ազատել հայ պատանդներին:
Արփինե ՍԻՄՈՆՅԱՆ
