«Մաքսային միություն մտնելուց հետո չի բացառվում, որ լուծվեն բոլոր այն խնդիրները, որոնք այժմ խանգարում են լինել եւ Եվրոպայի հետ, եւ Մաքսային միությունում: Այժմ այդ հարցերն են քննարկվում, ու նման բան հնարավոր է»,- այսօր «Հենարան» ակումբում նման կարծիք հայտնեց քաղաքագետ Հրանտ Մելիք-Շահնազարյանը՝ շեշտելով, որ Մաքսային միությունը Ռուսաստանին չի պատկանում:
Ինչ վերաբերվում է թուրքական եւ ադրբեջանական մամուլում Զարուհի Փոստանջյանի տված հարցի շնորհիվ տարածված հրապարակումներին, Հրանտ Մելիք-Շահնազարյանն ասաց. «Թուրքական-ադրբեջանական ԶԼՄ-ները ինքնաբավարարվելու նոր հնարավորություններ ստացան, նրանք Փոստանջյանի հարցից վերնագրեր դրեցին իրենց հոդվածներին, բայց նման քաղաքականությունը երբեք էլ հաջողություն չի ունեցել: Ու ասել, թե մենք տեղեկատվական պատերազմում տանուլ տվեցինք` այդպես չէ: Սա ներքին խնդիր էր, եւ Փոստանջյանի հարցադրումը մեր ընդդիմության ներկայիս ինդիկատորն է: Այդ հարցը երեւին նրա անձնական հետաքրքրությունների շարքից էր»:
Եվա ՀԱԿՈԲՅԱՆ
