ՀՀԿ գործադիր նիստում այսօր քննարկվել են ներկուսակցական հարցեր եւ անդրադարձել են Ֆրանսիա կատարած ՀՀ նախագահի այցին, ելույթին:
Նիստի ավարտից հետո ՀՀԿ փոխնախագահ Էդուարդ Շարմազանովը լրագրողներին ասաց, որ զինդատախազի նշանակման հարց չեն քննարկել. «ՀՀԿ-ն այն մարմինը չէ, որտեղ պետք է քննարկվեն ուժային կառույցների ղեկավարների նշանակման կամ փոփոխության հարցերը: Որեւէ կադրային հարց ՀՀԿ նիստում չի եղել»,- ասաց պարոն Շարմազանովը:
Հարցին, թե այսօրվա նիստին ՀՀ նախագահն անդրադարձե՞լ է ԵԽԽՎ-ում Զարուհի Փոստանջյանի հարցին, ասաց. «Բնականաբար, անդրադարձ չի կատարվել ձեր նշած պատգամավորուհու պահվածքին: Նախագահը հնարավորություն ունեցել է Ստրասբուրգում բոլոր հարցերին մանրամասն անդրադառնալ»:
Նա ԵԽԽՎ-ում Սերժ Սարգսյանի երեկվա ելույթը համարեց կանխատեսելի եւ վստահելի գործընկերոջ ելույթ. «Որովհետեւ Հայաստանը հավատարիմ է մնում ժողովրդավարության եւ ազատության արժեքների ամրապնդմանն ու զարգացմանը եւ մարդու իրավունքների պաշտպանության զարգացմանը մեր երկրում, եւ ՀՀ-ն եւս մեկ անգամ հաստատեց, որ անշրջելի է ժողովրդավարության զարգացումը Հայաստանում եւ պետք է շարունակենք քաղաքական բարեփոխումների անցկացումը մեր երկրում: Մենք եւս մեկ անգամ վերահաստատեցինք, որ մեր ռուսաստանցի եւ եվրոպական գործընկերների մեր հարաբերությունները չենք դիտարկում իրար հակասող գործընթացներ, այլ փոխլրացնող գործընթացներ ենք համարում: Վերահաստատեցինք, որ պատրաստ ենք նախաստորագրելու Ասոցացման համաձայնագրի քաղաքական մասը, որովհետեւ այդ համաձայնագրի մեխը քաղաքական բարեփոխումներն են»:
Կարդացեք նաև
Նա նաեւ ասաց, որ Հայաստան-ԵՄ համագործակցության հարցում երկխոսությանը ոչ թե վերջակետ, այլ ստորակետ է դրվել. «Երկխոսությունը շարունակվում է, որովհետեւ երկխոսությունը բխում է ե՛ւ ԵՄ ե՛ւ Հայաստանի շահերից: Այդ համաձայնագիրը կկնքվի, թե՝ ոչ, Հայաստանը վճռական է իրականացնել քաղաքական բարեփոխումները, որ մեր երկիրը դառնա ավելի ժողովրդավարական: Մենք պետք է արձանագրենք, որ այսօրվա Հայաստանն ավելի ժողովրդավարական է, ավելի ազատ է, այստեղ ավելի պաշտպանված են խոսքի ազատությունը քան վեց, յոթ տարի առաջ»:
Արփինե ՍԻՄՈՆՅԱՆ
