Նա պնդում է, որ քրեական վարույթ իրականացնող մարմինը մեկ ամսից ավել է, չի կատարում ՀՀ Լոռու մարզի դատարանի կայացրած եւ ուժի մեջ մտած դատական ակտը:
ՀՀ փաստաբանների պալատի անդամ, փաստաբան Ռուբեն Հակոբյանը օրերս պատրաստվում է հանցագործության մասին հաղորդում ներկայացնել պատկան իրավապահ մարմիններին:
Նա պնդում է, որ քրեական վարույթ իրականացնող մարմինը մեկ ամսից ավել է, չի կատարում ՀՀ Լոռու մարզի դատարանի կայացրած եւ ուժի մեջ մտած դատական ակտը:
«Իմ պաշտպանյալի` Արթուր Երամյանի նկատմամբ, քրեական գործ էր հարուցվել սպանության հանցափորձի հատկանիշներով: Ենթադրյալ հանցանքը կատարվել է 1997 թվականին: Քրգործի հարուցումից հետո իմ պաշտպանյալը գտնվել է հետախուզման մեջ` կալանքի սանկցիայով: Արթուր Երամյանը դեռեւս 2012 թվականին Ուկրաինայի Հանրապետությունից ՀՀ պատկան մարմիններին ուղարկել էր պատշաճ նոտարական կարգով վավերացված դիմում, որ չի առարկում, որպեսզի իր նկատմամբ կիրառվեն քրեական պատասխանատվության վաղեմության ժամկետները եւ այդ հիմքով քրեական գործով վարույթը կարճվի: Նախաքննական մարմինը, սակայն, համապատասխան ստուգումներ անցկացնելուց հետո, թեեւ եկել էր համոզման, որ վաղեմության ժամկետը խախտված չէ, այնուամենայնիվ, չէր կարճել քրեական գործով վարույթը` տարբեր արհեստական պատճառաբանություններ բերելով»,-ասում է Ռուբեն Հակոբյանը:
Կարդացեք նաև
Փաստաբանը այս տարվա գարնանն է ներգրավվել մեղադրյալ Արթուր Երամյանի շահերի պաշտպան:
Այդ ընթացքում իր պաշտպանյալն արդեն երկրորդ անգամ է պատշաճ նոտարական կարգով վավերացված դիմում ներկայացրել իրավապահ մարմիններին:
Փաստաբանի խոսքերով, երեք ամիս անց միայն նախաքննական մարմինը արձագանքել է իր` քրեական գործով վարույթը կարճելու մասին միջնորդությանը, այն էլ այն ժամանակ, երբ ինքը դիմել էր դատարան` քննիչի անգործությունը վերացնելու պահանջով:
«Այդ ընթացքում նոր կայացվեց որոշում` իմ միջնորդությունը մերժելու վերաբերյալ»,-ասում է փաստաբանը:
Մերժումից հետո Ռուբեն Հակոբյանը դիմել է դատախազին, բայց ապարդյուն:
«Դատախազը մասնակիորեն բավարարեց բողոքս, բայց, ըստ էության, մերժեց, քանի որ ես պահանջել էի կարճել վարույթը, դադարեցնել հետախուզումը, վերացնել խափանման միջոց կալանքը, այդ երեք պահանջներից որեւէ մեկը չէր բավարարվել: Դիմեցի դատարան, որպեսզի դատարանը պարտավորեցնի վերացնել այդ որոշումները, քանի որ հանցագործության վաղեմությունը վաղուց անցել է, բայց մարդը դեռ հետախուզման մեջ կալանքի սանկցիայի առկայության պայմաններում թաքնվում է, երբ որ արդեն պարտավոր են կարճել քրեական գործով վարույթը»:
Լոռու մարզի առաջին ատյանի դատարանը այս տարվա օգոստոսի 29-ին բավարարել է փաստաբան Ռուբեն Հակոբյանի բողոքը` պարտավորեցնելով վարույթ իրականացնող մարմնին վերացնել Արթուր Երամյանի իրավունքների եւ ազատությունների խախտումը: Բացի այդ` դատարան ներկայացած դատախազը եւս համաձայն է եղել դատարանի որոշման հետ` գտնելով, որ պետք է կարճել քրեական գործով վարույթը` վաղեմության հիմքերի անցած լինելու պատճառաբանությամբ:
«Ուժի մեջ է մտել օգոստոսի 29-ին, մեղադրանքի կողմը չի բողոքարկել տասնօրյա ժամկետում, արդեն 34 օր է` դատական ակտը դիտավորությամբ չի կատարվում: Ես` որպես Արթուր Երամյանի շահերի պաշտպան, հաղորդում եմ ներկայացնելու հանցագործության մասին` դատական ակտը չկատարելու վերաբերյալ: Իմ կարծիքով այստեղ ենթադրաբար առկա է նաեւ պաշտոնեական լիազորությունների չարաշահում»,-եզրափակում է փաստաբան Ռուբեն Հակոբյանը:
Անուշ ԲՈՒԼՂԱԴԱՐՅԱՆ
