Կայացավ ՀՀ Հանրային խորհրդի մշակույթի ենթահանձնաժողովը: Հանձնաժողովի օրակարգում քննարկեցին երեք հիմնական հարցեր՝ իրականացնել Արամ Խաչատրյանի 110-ամյակին նվիրված միջոցառումների շարք, Լուսինե Զաքարյան, Խորեն Պալյան երախտավոր զույգի բնակարանը տուն-թանգարանի վերածելու եւ Կիմ Երիցյանի արձանի կառուցման եւ տեղադրման գործընթացը իրականացնելու հարցերը:
Հայաստանում Զարդ մշակութային հ/կ-ն ստեղծել է աշխատանքային խումբ եւ ծրագիր, որը նախատեսված է իրականացնել 2013թ.-ի հունիսից մինչեւ 2014թ.-ի հունիսը: Կոմպոզիտոր Վաչե Շառաֆյանի խոսքով Արամ Խաչատրյանի 110-ամյակին նվիրված միջոցառումները բազմազան են: Կկազմակերպվեն վիկտորինա խաղեր՝ հարցերը վարպետի կենսագրականից կլինի, դիմանկարների մրցույթ, երաժշտության մրցույթ: Միջոցառմանը հնարավորություն կունենան մասնակցելու բազմաթիվ մարդիկ, արվեստասերների մեծաթիվ բանակ կհավաքվի.
«Նրա երաժշտությունն արդի է եւ վիզուալ: Կա վարպետներին գնահատելու եւ հիշելու մեծ բաց, որը պետք է լրացվի: Ծրագիրը իրականացնելու համար խանգարող որեւէ համակարգ չկա»:
Ճարտարապետ Լեւոն Իգիթյանի համոզմամբ յուրաքանչյուր միջոցառում անցկացնելու համար աջակիցներ են պետք: Արամ Խաչատրյան անունը շոշափողները պետք է հիմք ունենան կամ այնքան իրավունքներ, որ անգամ շոշափեն: Առաջարկը հիմնավոր համարելով հանրային խորհրդի անդամները համաձայնություն տվեցին ծրագիրը իրականացնելուն:
Կարդացեք նաև
Երկրորդ հարցը, որը դրվեց քննարկման եւ հավանության արժանացավ դա երգչուհի Լուսինե Զաքարյանի բնակարանը տուն-թանգարան վերածելու նախագիծն էր:
Լուսինե Զաքարյանի անունը կրող ֆեյսբուքյան էջի հիմնադիր Վարդուհի Սուքիասյանը պայքարում է բնակարանը հետ վերադարձնել անարժան ժառանգներից: Բանն այն է, որ չունենալով հետնորդ զույգի բնակարանը մնացել է Խորեն Պալյանի մոտ եւ հեռավոր ազգականներին, որոնք էլ այն կռվախնձորի են վերածել: Բնակարանն արդեն 7 տարի է անուշադրության է մատնված, այն անմխիթար վիճակում է.
«Տունն ավիրված է, դա Խորեն Պալյանի եղբոր տղաների ձեռքի գործն է, մենք գործ ունենք մշակութային ժառանգության հետ, որը պատրաստ է թանգարան դառնալուն: Ելնելով բնակարանի ոչ պատշաճ վիճակից՝ պետությունն իրավունք ունի զրկել անարժան ժառանգներին ժառանգությունից»:
Լեւոն Իգիթյանի խոսքով ազգային արժեքը սեփականություն չէ, այն բոլորինն է: Անիմաստ է բարեկամների դարդը քաշել, անհրաժեշտ է հայցով դիմել դատարան եւ տուն-թանգարանի հարցը բարձրացնել հանրային խորհրդի անունից:
Երրորդ հարցը Կիմ Երիցյանի արձանի կառուցման եւ տեղադրման գործընթացն է:
«Կիմ Երիցյան» մշակութային հասարակական կազմակերպությունը նախաձեռնել է հայ ժողովրդի կողմից սիրված, կինոյի եւ թատրոնի ժողովրդական դերասան Կիմ Երիցյանի արձանի կառուցման եւ տեղադրման աշխատանքները:
ՀԿ նախագահ Լեւոն Բարսեղյանի պնդմամբ իրենց ցանկությունն է արձանը տեղադրել փոքր կենտրոնի որեւիցե պուրակում կամ մշակութային օջախներից մեկում: Ֆինանսավորումը կա, միայն տարածքն է անհրաժեշտ:
Հանրային խորհուրդը որոշեց քննարկել եւ այնպիսի եզրակացության գալ, որը միայն ծրագրի օգտին կլինի:
Անժելա ՇԱՀՈՒՄՅԱՆ
