Aravot.am-ի հարցին`արդյոք արժանի թեկնածու է նորանշանակ գլխավոր դատախազ Գեւորգ Կոստանյանը, եւ նախկին դատախազ Աղվան Հովսեփյանի գործի շարունակողը կլինի նա, երկար տարիներ այդ կառույցում կաշխատի արդյո՞ք, հերթը կհասնի դուռը համբուրելուն, թե ոչ, պատասխանելով սոցիոլոգ Ահարոն Ադիբեկյանը ասաց. «Դա մութ հարց է, սովորաբար նման նշանակումները հիմնվում են դատախազական մարմնի կարծիքների վրա, բացի այդ` նշանակություն ունի այն, թե ինքը, որ կուսակցությանն է պատկանում: Ամենակարեւորը այն է, որ նա բավականին ինքնուրույն է, այսինքն` նրա որոշման վրա չի կարելի հեռախոսով ազդել, ու կարծես թե «կրեպկի օրեշեկ» է: Տպավորություն կա, որ նա բավականին հաղթանդամ եւ ուժեղ տղամարդ է, ու գուցե կկարողանա իր տեսակետն առաջ տանել: Կարեւորը` երդում կերավ, որ արդարությունը կպաշտպանի բոլոր միջոցներով»:
Դիտարկմանն էլ` նախկին դատախազ Աղվան Հովսեփյանը «կրեպկի օրեշեկ» չէ՞ր, Ահարոն Ադիբեկյանն ասաց. «Նա ավելի ճկուն էր, ավելի իմաստուն: Բացի այդ` միշտ չէ, որ հետեւողականությունը արդյունավետ է, պետք է նաեւ շեղում լինի, բայց ոչ շատ մեծ, որ կարողանաս արդար երեւալ: Արդար լինել` չի նշանակում ատամ առ ատամ մեկին մեղադրել, պետք է լինի նաեւ ներողամտության կոմպոնենտ եւ դա դատախազի ամենակարեւոր հատկանիշն է, հասկանալու հանցանքի խորությունը, լայնությունն ու հետեւանքները, այնուամենայնիվ նա պետք է լինի մարդ»:
Եվա ՀԱԿՈԲՅԱՆ
