Այսօր խորհրդարանում, երբ կառավարությունը պատասխանում էր պատգամավորների հարցերին, ՀԱԿ խմբակցության քարտուղար Արամ Մանուկյանը ասաց, որ արդեն վեց ամիս է, ինչ ինքը խնդրում է Հայռուսգազարդի հետ ՀՀ կառավարության կնքած պայմանագրի տեքստը, եւ վեց ամիս շարունակ այդ տեքստը չի տրամադրվում իրեն: Պարոն Մանուկյանին հետաքրքրում էր՝ ինչո՞ւմն է խնդիրը, մի՞թե այդ փաստաթուղթը, որը վերաբերվում է ՀՀ բոլոր քաղաքացիներին անխտիր, իր մեջ «պետական գաղտնիք» է պարունակում, ինչո՞ւ իրեն չեն տրամադրում այն տեղեկությունը, որը պատգամավորը պետք է եւ կարող է ունենալ:
Նրա հարցին վարչապետ Տիգրան Սարգսյանի պատասխանն անակնկալ էր բոլորի համար. «Բնականաբար, ցանկացած պայմանագիր, որ կստորագրենք գործընկերների հետ, հասանելի կլինի ձեզ համար: Պայմանագիրը դեռ ստորագրված չէ: Մենք ունենք պայմանագրի նախագծեր, որոնք պետք է ստորագրվեն, երբ ստորագրվեն, դրանք գալու են Ազգային ժողով, որպեսզի ձեզ հետ միասին քննարկենք դրանում ներառված դրույթները»:
Մելանյա ԲԱՐՍԵՂՅԱՆ
