«Արդյոք Դուք Մաքսային միությանը անդամակցելու որոշում կայացնելուց առաջ խորհրդակցե՞լ եք ՀՀ քաղաքական, այդ թվում նաև ընդդիմադիր ուժերի հետ»,-այսօր ԵԽԽՎ աշնանային նստաշրջանի լիագումար նիստի ընթացքում ՀՀ նախագահ Սերժ Սարգսյանին այսպիսի հարց հղեց լատվիացի պատվիրակ Էգիդիժուս Վարեյկիսը:
ՀՀ նախագահը պատասխանեց. «Հարցը քննարկվել է քաղաքական ուժերի հետ, և եթե Ձեզ ասեմ, որ ընդդիմադիր ուժերի հետ հարցը խորությամբ քննարկվել է, անկեղծ չեմ լինի: ՀՀ Սահմանադրությունը ՀՀ նախագահին է վերապահում արտաքին քաղաքականության իրականացումը և Սահմանադրությունը բոլոր հնարավորությունները նրան տալիս է միջազգային պայմանագրեր ստորագրելու: Միակ առանձնահատկությունն այն է, որ բոլոր այդ պայմանագրերը գալու են ՀՀ խորհրդարան: Այդ որոշումը բխում է նաև ՀՀ քաղաքական ուժերի շահերից, այն բխում է հայ ժողովրդի շահերից, մենք հազարավոր թելերով ենք կապված Մաքսային միության երկրների հետ, արտահանման մեկ երրորդը բաժին է հասնում ՌԴ-ին, դրանք հիմնականում գյուղատնտեսական ապրանքներ են»:
Անդրադառնալով պատվիրակի այն հարցին, թե արդյոք այդ խնդրի քննարկման համար հանրաքվեի անհրաժեշտություն կա, Սերժ Սարգսյանը պատասխանեց, թե դրա անհրաժեշտությունը չի տեսնում:
Տաթև ՀԱՐՈՒԹՅՈՒՆՅԱՆ
