Այսօր Ազգային ժողովում շարունակվեց ՀՀ նախագահի կողմից ներկայացված ՀՀ 22-րդ տարեդարձի կապակցությամբ համաներում հայտարարելու մասին առաջարկի քննարկումը:
Իր առաջարկներով հանդես եկավ անկախ պատգամավոր Էդմոն Մարուքյանը, որը նաեւ հերթական անգամ անդրադարձավ Արամ Մուղալյանի գործին: Արամ Մուղալյանը, որը երեկվանից հացադուլ եւ ջրադուլ է հայտարարել՝ արդեն հինգ ամիս է, նախնական կալանքի տակ է գտնվում՝ ենթադրաբար «խոտի դեզ այրելու» համար: Այս երիտասարդը Քեմբրիջի համալսարանի շրջանավարտ է, ու սովորել է «Լույս» հիմնադրամի աջակցությամբ: Նրա մեղքի որեւէ էական ապացույց չկա, սակայն նրա նկատմամբ ընտրված խափանման միջոցը չի փոխվել:
Իր եզրափակիչ խոսքում արդարդատության նախարար Հրայր Թովմասյանը կրկին շեշտեց, որ համաներումը իրենից չի ներկայացնում արդարադատական ակտ, ունի զուտ մարդասիրական, սոցիալական, իրավաքաղաքական նշանակություն:
Նա նաեւ վստահեցրեց, որ ապահովելու է ամենաբարձր հրապարակայնություն՝ համաներման գործընթացի համար, որովհետեւ չի կարելի, որ երկրի բարձրագույն իշխանությունների կողմից ձեռնարկված քայլը հանկարծ արժեզրկվի, ցեխոտվի «ինչ-որ մի ՔԿՀ-ի, զորամասի կամ հիվանդանոցի» աշխատակցի պատճառով:
Կարդացեք նաև
Եվ որպեսզի «ցեխ շպրտելու» բոլոր փորձերը ձախողվեն եւ բացահայտվեն, պարոն նախարարը խնդրեց պատգամավորներից, որոնք ավելի հաճախ եւ լայն շրջանակներով են շփվում ժողովրդի հետ, իրեն տեղեկացնեն բոլոր այդ ազդակների մասին:
ԱԺ նախագահ Հովիկ Աբրահամյանն էլ ողջունեց «տարբեր հանգամանքների բերումով սայթաքած» անձանց նկատմամբ մարդասիրական վերաբերմունքը.«Համաներումը մեր քրիստոնեական արժեքներից բխող քայլ է»:
Համաներման առաջարկը կքվեարկվի, հավանաբար, վաղը:
Մելանյա ԲԱՐՍԵՂՅԱՆ
