Այսօր «Ուրբաթ» ակումբում «Անմեղության հայկական ծրագիր» հ/կ նախագահ Զարուհի Մեջլումյանը խոսելով համաներման սոցիալ-հասարակական հետեւանքների թեմայով, նշեց. «Հայաստանում կրկնահանցագործությունների թիվը ընդհանուր առմամբ քսան տոկոս է կազմում: Կան երկրներ, որտեղ համաներումը շատ հաճախ է կիրառվում, օրինակ՝ Վրաստանում, Իրանում: Համաներումը նպատակ ունի բանտերի գերբեռնվածությունը թեթեւացնելու, իսկ Հայաստանում համաներում կիրառվել է ընդամենը յոթ անգամ, վերջինը` 2011 թվականին էր»:
Զարուհի Մեջլումյանը հավելեց, որ համաներումն ավելի շատ կիրառվում է թեթեւ եւ միջին ծանրության հանցագործություններ կատարածների վերաբերյալ: Ըստ նրա`ծանր հանցագործություն կատարածները չեն ազատվի պատժից, պարզապես այն կկրճատվի վեց ամսով: Ազատ կարձակվեն մոտավորապես 500 հոգի, որոնք ժամանակ առ ժամանակ պետք է ներկայանան ոստիկանություն:
Զարուհի Մեջլումյանը հատկանշական համարեց այն, որ մեզ մոտ` Հայաստանում, չկան վերականգնողական կենտրոններ, որտեղ քրեակատարողական հիմնարկից դուրս եկած անձը կկարողանա վերականգնվել:
Եվա ՀԱԿՈԲՅԱՆ
