«Հասարակական առաջընթաց» քաղաքացիական նախաձեռնության անցկացրած սոցհարցումների համաձայն՝ Հայաստանից մեկնածների 60 տոկոսը դժգոհ են արտագաղթելու իրենց կայացրած որոշումից:
Այսօր «Արտագաղթի հոգեբանությունը» թեմայով գիտաժողովի ժամանակ տնտեսական գիտությունների թեկնածու Կառլեն Խաչատրյանը ներկայացրեց Հայաստանի բնակչության արտագաղթման հակվածության գործոնի իր վերլուծությունը. «Թյուր կարծիք է, թե երկիրը լքած մարդու համար արտասահմանում ամեն ինչ լավ է, ամեն ինչ գունավոր է ներկայացվում»:
Ըստ նրա, սովորաբար Ռուսաստան մեկնում են միջին տարիքի տղամարդիկ, ինտելեկտուալ մակարդակը, կրթությունը արտագաղթի միտումների վրա որեւէ ազդեցություն չունեն. «Հավասարապես թե բարձրագույն կրթություն ունեցող, թե ցածր որակավորում ունեցող աշխատուժը միտված են գնալու»:
Նա նաեւ պարզել է, որ չարտագաղթածներից տղամարդիկ են ավելի շատ միտված հեռանալու, իսկ ներգաղթածներից ավելի շատ կանայք են միտված հեռանալու. «Վերադարձած կանայք ավելի մեծ ցանկություն ունեն վերադառնալ եւ միավորվել արտասահմանում ընտանիքի մյուս անդամներին: Մեկնածների պարագայում աշխատանք ունենալ-չունենալը չի ազդում մեկնելու ցանկության վրա: Թե աշխատանք ունեցողները, թե չունեցողները ցանկություն ունեն լքելու երկիրը: Իսկ ներգաղթողների պարագայում, այստեղ աշխատանք ունեցողներն էլ չեն ցանկանում մեկնել»:
Գիտությունների թեկնածուն եզրահանգել է՝ արտագաղթը սոցիալական խնդիր է, որն ունի հոգեբանական ասպեկտ:
Արփինե ՍԻՄՈՆՅԱՆ
Փոշմանողը հետ կգար….Լռելը, երբեմն ավելի պատվաբեր է