Սեպտեմբերի 30-ին Չեխիայում ՀՀ դեսպանությունը մայրաքաղաք Պրահայի «Ինտերկոնտինենտալ» հյուրանոցում կազմակերպել էր ընդունելություն` նվիրված ՀՀ Անկախության 22-րդ տարեդարձին: Միջոցառմանը, որին ներկա էին շուրջ 250 հոգի, մասնակցում էին Չեխիայի կաթոլիկ եկեղեցու առաջնորդ, կարդինալ Դոմինիկ Դուկան, Չեխիայի Կրթության, երիտասարդության եւ սպորտի նախարար Դալիբոր Շտիսը, նախագահի աշխատակազմի արտաքին կապերի վարչության պետ, դեսպան Հինեք Կմոնիչեկը, սենատորներ, երկրում հավատարմագրված դիվանագիտական կորպուսի բազմաթիվ ներկայացուցիչներ, Արտաքին գործերի, Պաշտպանության նախարարությունների եւ այլ գերատեսչությունների բարձրաստիճան պաշտոնյաներ, մշակույթի եւ արվեստի գործիչներ, լրագրողներ, հասարակական կազմակերպությունների, Չեխիայի գործարար աշխարհի, Չեխիայի եւ Սլովակիայի հայ համայնքների ներկայացուցիչներ եւ հյուրեր Հայաստանից։
Միջոցառման սկզբում հնչեցին Հայաստանի եւ Չեխիայի օրհներգերը չեխահայ երգչուհի Վարինե Մկրտչյանի կատարմամբ: Այնուհետեւ ելույթներով հանդես եկան Չեխիայում ՀՀ դեսպան Տիգրան Սեյրանյանը եւ Սենատի ԵՄ կոմիտեի անդամ, սենատոր Յան Լատկան, որը հանդիսության մասնակիցներին ներկայացրեց օրերս Հայաստան կատարած պաշտոնական այցի տպավորությունները: Դեսպանը հյուրերին ներկայացրեց ՀՀ անցած 22-ամյա ուղին, անցյալի եւ ժամանակակից մարտահրավերները, անդրադարձավ Լեռնային Ղարաբաղի հիմնահարցին: Այնուհետեւ դեսպանը խոսեց հայ-չեխական հարաբերությունների եւ դրանց հեռանկարի, Չեխիայի հայ համայնքի մասին, անդրադարձավ նաեւ Հայաստանի արտաքին քաղաքականության առաջնահերթություններին:
Միջոցառման ավարտին տեղի ունեցավ հյուրասիրություն:
Կարդացեք նաև
ՀՀ ԱԳՆ
