Երեւան-Մեղրի ճանապարհին «Ժառանգության» պատգամավոր Զարուհի Փոստանջյանի՝ ռուս սահմանապահների հետ կատարված միջադեպը ՀՀՇ վարչության նախկին անդամ Հովհաննես Իգիթյանը Հայաստանի՝ Մաքսային միություն մտնելու հետ է կապում:
Այս առնչությամբ, Aravot.am-ի հետ զրույցում նա վստահեցրեց, որ ռուս սահմանապահները ոչ մի իրավունք չունեին այդտեղ իրենց այդքան լկտի պահելու: Պարոն Իգիթյանի համոզմամբ՝ «ФСБ-շնիկները, ռուս սահմանապահները այդ միջադեպի ժամանակ օրենք են խախտել եւ պետք է ձերբակալվեն՝ իրենց արարքի համար: Եթե այս անգամ մեր իշխանությունները թույլ տան, որ դա մնա անպատիժ, ապա շատ շուտով ռուսներն իրենց տանտեր կզգան եւ մեզանից յուրաքանչյուրի հետ մեծ տերության դիտանկյունից կխոսեն, չեն հարգի, մեր երկրում մեզ կճնշեն եւ այդ լկտիության առաջն առնել չի լինի»:
Ըստ պարոն Իգիթյանի, կապ չունի՝ Զարուհի Փոստանջյանը պատգամավոր է, թե շարքային ՀՀ քաղաքացի, ռուս սահմանապահները պետք է իրենց գործով զբաղվեին. «ՀՀ քաղաքացու մեքենա այստեղ իրավունք ունի կանգնեցնել միայն մեր ճանապարհատրանսպորտային վարչության, պետավտոտեսչության աշխատակիցը, ոչ թե ռուս սահմանապահը: Անկախ այդ բացատրությունից, թե իրավապահ մարմիններին էին օգնում, նրանք դրա իրավունքը չունեին կանգնեցնել մեքենան, ստուգել փաստաթղթեր եւ իրենց այդպես պահել: Իրավապահ մարմիններին օգնելով՝ մեր օրենքները չպիտի խախտեին: Նախ, իրենք պետք է այստեղ խոսեին հայերեն, մեր քաղաքացին պարտավոր չէ իրենց հետ ռուսերեն շփվել, մեր պետական լեզուն հայերենն է: Եթե նույնիսկ թմրամոլի էին բռնում, ՀՀ քաղաքացիների մեքենաները պետք է կանգնեցներ եւ նրանց փաստաթղթերը ստուգեր իրավասու մեկը»:
Հռիփսիմե ՋԵԲԵՋՅԱՆ
