Ձուն թանկացել է 30 տոկոսով, դեղերի գները` 3 տոկոսով, բուժծառայությունները` 17 տոկոսով են գնաճ արձանագրել, տաքսիների սակագների աճն էլ 11 տոկոս է եղել:
Այսօր «Հենարան» մամուլի ակումբում նախորդ տարվա համեմատությամբ, այսպիսի տվյալներ ներկայացրեց ազգային վիճակագրական ծառայության (ԱՎԾ) գների վիճակագրության եւ միջազգային համադրումների բաժնի պետ Գուրգեն Մարտիրոսյանը:
Ըստ ԱՎԾ մասնագետի, գնաճը սեպտեմբերին կազմել է 3, 12 % : Գնաճ է եղել նաեւ հունվար, մարտ, մայիս, օգոստոս ամիսներին: Պարոն Մարտիրոսյանի տվյալներով, մրգի գները նվազել են 7,3 տոկոսով:
Գազի, էլեկտրաէներգիայի թանկացման հետեւանքով ընդհանուր արձանագրված գնաճի մեջ էներգակիրների թանկացման մասնաբաժինը 2, 5 % է կազմել:
Կարդացեք նաև
Ուսման վարձավճարների բարձրացումը նույնպես գնաճի մեջ իր մասնաբաժինն ունի` 8-13 %: Սեզոնով պայմանավորված, գնաճ է արձանագրվել նաեւ Արտաշատում եւ Կապանում:
Ավիատոմսերի շուկայում գնաճը նույնպես սեզոնային է եղել. Եթե, ըստ պարոն Մարտիրոսյանի, սեզոնին օրինակ` Մոսկվայի տոմսը միայն մի ուղղությամբ էր 130 հազար դրամ, ապա այժմ` գնալ-գալն է այդքան:
Ձվի թանկացումը ԱՎԾ մասնագետը պայմանավորեց ներքին արտադրության նվազմամբ: Այս տարվա սեպտեմբերին, օգոստոսի համեմատ, ձվի գինը բարձրացել է 9,4 %: Ձվի գնանկում արձանագրվել է ընդամենը հունիս ամսին: Իսկ դեկտեմբերից սկսած, մինչ օրս ձուն թանկացել է շուրջ 30 տոկոսով: Գնաճի մեջ էական տեսակարար կշիռ կունենա տրանսպորտի ուղեվարձի թանկացումը:
Լուսինե ԲՈՒԴԱՂՅԱՆ
