«Այն կանխատեսումներին, որոնք արվել էին նախորդ տարի՝ սոցիալական փաթեթի առողջապահության մասով, կառավարությունն ականջալուր չեղավ: Փոխարենը գնահատեին եւ 2013 թվականի համար նոր քայլեր ձեռնարկեին՝ սոցիալական փաթեթն ու առողջապահության ապահովագրությանը հատկացվող գումարներն էլի ու էլի բարձրացվեցին: Դեռ միջանկյալ հաշվետվությունը չկա, հնարավոր չէ գնահատել, բայց ինձ թվում է՝ նույն իրավիճակն է, ինչ որ 2012-ին էր»,- «Առավոտի» հետ զրույցում ասաց առողջապահության նախկին նախարար Արարատ Մկրտչյանը: Ի դեպ, վարչապետը հանձնարարել է աշխատանքի եւ սոցիալական հարցերի, ֆինանսների եւ առողջապահության նախարարներին ներկայացնել սոցիալական փաթեթը բարելավելու առաջարկություններ: Այս առումով էլ մեր զրուցակիցը նկատեց. «2012-ին էր նման աղաղակող խայտառակ իրավիճակ, 2013-ի գրեթե վերջում նոր որոշել են վերլուծել ու բարելավել: Բայց գործող մեխանիզմն են բարելավում, չգործող ծրագիրն ինքը կոռոպցիոն ռիսկերով լի է»:
«Առավոտ» օրաթերթ
