ՀՔՄ կազմակերպած «Մշակույթը որպես 21-րդ դարում ազգի մրցունակության առանցքային գործոն» թեմայով կոնֆերանսին անցյալ շաբաթ զեկույցով հանդես էր եկել ՌԴ մշակույթի նախարար Վլադիմիր Մեդինսկին: Վերջինս մի համեմատություն էր արել, որը, թերեւս, բնորոշում է ռուս պաշտոնյայի՝ հայերին վերաբերելու ձեւին ու մտածողությանը։ Մեդինսկին հիշել էր Չարդախլու գյուղը. դա այն գյուղն է, որը հայրենական պատերազմի ժամանակ երեք հայազգի մարշալներ էր տվել խորհրդային բանակին, եւ, ինչպես հայտնի է, հայերը մշտապես հպարտացել են այդ փաստով: Մեդինսկին ասել էր. «Անհավատալի է, որ այդ գյուղը խորհրդային բանակին տվել է երեք մարշալ, պատկերացրեք անգլիացուն պատմեն, թե հնդկական մի փոքր գյուղից դուրս են եկել անգլիական բանակի երեք մարշալներ… իրոք անհավատալի է…»։ Այսինքն՝ ռուս երիտասարդ պաշտոնյայի պատկերացմամբ՝ ժամանակին Անգլիայի գաղութ հանդիսացող Հնդկաստանն ու Ռուսաստան-հայ մարշալներ համեմատությունը գտնվում է նույն մակարդակում։ Այսօրվա ՌԴ-ում իշխում է նույն գաղութային մտածելակերպը, ՌԴ օրենսդիրների բոլոր քայլերը վերջին ամիսներին հենց դա են վկայում:
«Առավոտ» օրաթերթ
