Այսօր ԱԺ-ում շարունակվում է գլխավոր դատախազի թեկնածության քննարկումը: Հիշեցնենք, որ այդ պաշտոնում Սերժ Սարգսյանն առաջարկել է Գեւորգ Կոստանյանի թեկնածությունը, որի մասին նախորդ շաբաթ ԱԺ գրեթե բոլոր խմբակցությունները հիմնականում դրական էին արտահայտվում:
Այսօր քննարկումը սկսվեց ՀԱԿ խմբակցության պատգամավոր Նիկոլ Փաշինյանի ելույթով, որը հայտարարեց, թե դեմ է քվեարկելու Գեւորգ Կոստանյանի թեկնածությանը:
Նա նկատեց, որ մի խումբ փաստաբաններ միանշանակ էին իրենց կարծիքում. «Երբ մտածում էինք, թե Սերժ Սարգսյանը ում կարող է նշանակել, որ Աղվան Հովսեփյանից վատը լինի, եզրակացությունը միանշանակ էր՝ Գեւորգ Կոստանյանը»: Պարոն Փաշինյանի համար հարց էր, թե «որքանով է օբյեկտիվ նման գնահատականը, երբ նույնիսկ իրենց ընդդիմադիր համարող որոշ շրջանակներ փոքր դիֆերամբներ են ձոնում նրա հասցեին», նա ենթադրում է, որ այդ դիֆերամբների պատճառը, թերեւս, վերջինիս Նոթհինգհեմյան դիպլոմն է: «Սակայն ծառը ճանաչում են պտուղից»,- հայտարարեց պարոն Փաշինյանը, նկատելով, որ Կոստանյանի տված պտուղներից մեկը Սուրիկ Խաչատրյանի տան մոտ հունիսի 1-ին կատարված սպանության հետաքննությունն է, որից «վատ հոտ է գալիս»:
Այդ վատ հոտով գործի մասին Փաշինյանը ներկայացրեց իր մի շարք դիտարկումները, որոնք ներկայացրել էր նաեւ երեկ՝ Կոստանյանի հետ հարց ու պատասխանի ժամանակ: Այդ դիտարկումների արդյունքում պարոն Փաշինյանը եզրահանգում է, որ Ավետիք Բուդաղյանին մահացու վնասվածքը հասցվել է Սուրիկ Խաչատրյանի կողմից եւ որ զինդատախազ Գեւորգ Կոստանյանը նրա հանցագործությունն ուղղակի պարտակել է. »Փաստերի համադրումն ակնհայտ է դարձնում, որ զինդատախազ Գեւորգ Կոստանյանի ղեկավարությամբ նախաքննությունն ամեն ինչ արել է շրջանցելու եւ կոծկելու համար փաստերը»:
Կարդացեք նաև
Ըստ Փաշինյանի՝ եթե նորմալ նախաքննություն իրականացվեր, գուցե թե ակնհայտ դառնար, որ վերեւից ներքեւ հասցված կրակոցի հեղինակը Սուրիկ Խաչատրյանն է, եւ խոսքը գուցե թե գնում է ոչ թե անհրաժեշտ պաշտպանության, այլ՝ դիտավորությամբ սպանելու փաստի հետ:
Եվ եզրափակեց. «Իրավական երկրում Գեւորգ Կոստանյանին ոչ թե կներկայացնեին գլխավոր դատախազի թեկնածու, այլ կկասեցնեին նրա գործունեությունը որպես զինդատախազ եւ կներգրավեին այդ գործում՝ որպես կասկածյալ»:
Մելանյա ԲԱՐՍԵՂՅԱՆ
