Դաքքայի Արմանիտոլա թաղամասի հայկական եկեղեցին դե ֆակտո դարձել է մի հոգու մատուռ, այն բանից հետո, երբ հայերը սերունդ առ սերունդ լքեցին Բանգլադեշը: Գրում է «Դհակա Տրիբուն» թերթը:
1781թ. կառուցված եկեղեցին այժմ դարձել է հնագիտական վայր, որը գտնվում է կառավարության ճարտարապետության վարչության իրավասության տակ:
Եկեղեցու նկատմամբ ընդամենը մի հոգի է հոգ տանում՝ անգլիականացված անունով Մայքլ Ջոզեֆ Մարտինը: Եկեղեցում հազվադեպ են լինում այցելուներ ու հիմնականում այն փակ է:
Մարտինը, ով հետևելով իր հոր հետքերին՝ երկրում բնակություն է հաստատել 1942թ. ու ով, հավանաբար, տեղի վերջին հայն է, հոգ է տանում եկեղեցու և նրա հարևանությամբ գտնվող գերեզմանատան նկատմամբ, որտեղ թաղված են մոտ 400 հայեր, այդ թվում՝ Մարտինի կինը:
Կարդացեք նաև
Նա միայնակ է ապրում եկեղեցու հսկայական տարածքում և հազվադեպ է այցելում Կանադայում ապրող իր դուստրերին:
Երբ այս թղթակիցը հանդիպել է Մարտինին, որն այժմ յոթանասունն անց է, նա չի կարողացել տալ մեկի անունը, ով կհաջորդի իրեն իր մահվանից հետո, թեպետ 2009թ. «Ֆրանս պրես» գործակալությանը տված հարցազրույցում նա ակնկալում էր, որ իր երեք դուստրերից մեկն ու մեկը կգա ու «այստեղ կպահպանի մեր ներկայությունը»:
«Կամ գուցե ինչ-որ տեղից այլ հայեր կգան այստեղ», – ասել է նա «Ֆրանս պրես»-ին՝ ավելացնելով, որ աստված թույլ չի տա, որ նման վայրն անպաշտպան ու լքված մնա:
Պատրաստեց Հովհաննես ԻՇԽԱՆՅԱՆԸ
