ՀՀ առողջապահության նախարար Դերենիկ Դումանյանն այսօր ընդունեց ամերիկահայ ակնաբույժ, «Հայկական ակնաբուժության նախագիծ» բարեգործական կազմակերպության հիմնադիր-նախագահ, Ռոջեր Օհանեսյանին եւ կազմակերպության հայաստանյան գրասենյակի ղեկավար Նունե Եղիազարյանին։
Նախարարը չափազանց բարձր գնահատեց անցած 21 տարվա ընթացքում ՀԱՆ-ի Հայաստանի ակնաբուժության զարգացման գործում ունեցած ներդրումը։ Կազմակերպությունը, համագործակցելով ՀՀ առողջապահության նախարարության եւ ԱՄՆ Միջազգային զարգացման գործակալության հետ, մարզերում եւ Երեւանում իրականացնում է «Լույս հայի աչքերին» ծրագիրը, որի շրջանակում մարզերում իրականացվել են բնակչության ակնային լայնածավալ զննումներ եւ ցուցաբերվել է անհրաժեշտ բուժօգնություն: Շուտով կսկսվի մարզային հերթական` վեցերորդ շրջայցը։
Ռոջեր Օհանեսյանը նշեց, որ մարզային ակնաբուժական կենտրոններում նախատեսվում են զննման սենյակ եւ վիրահատարան, որոնք կհագեցվեն անհրաժեշտ ժամանակակից սարքավորումներով։ Կիրականացվեն առավել տարածված հիվանդությունների` կատարակտի եւ գլաուկոմայի վիրահատություններ: Ծրագրի հետագա հաջողության գործում նա կարեւորեց այդ կենտրոններում աշխատող բժիշկների մասնագիտական հմտությունները եւ մատուցվող ծառայությունների որակը, որպեսզի չշարունակվի մարզերից հոսքը դեպի մայրաքաղաք:
Կարդացեք նաև
Դերենիկ Դումանյանն առաջարկեց ակնաբուժական առաջին կենտրոնը հիմնել Տավուշի մարզում, հավելելով, որ մարզային ղեկավարությունն արդեն պատրաստ է դրան եւ ծրագրի մասնագետների հավանությանն է արժանացել այն Իջեւանի արդիականացված բժշկական կենտրոնում կազմակերպելու առաջարկը։ Նախարարը նաեւ նշեց, որ արդեն պայմանավորվածություն է ձեռք բերվել Սիրիայից հայրենիք վերադարձած ակնաբույժ ամուսինների հետ, ովքեր Սիրիայում ակնաբուժական կլինիկա են ունեցել, բարձր որակավորման մասնագետներ են եւ պատրաստակամություն են հայտնել աշխատել Տավուշի մարզի այդ կենտրոնում:
Այնուհետեւ, առաջնորդվելով նույն սկզբունքներով, Դերենիկ Դումանյանն առաջարկեց ծրագրի իրագործումը հաջորդաբար շարունակել Գյումրիում, Վայոց ձորում, Լոռիում, Սյունիքում։ Քննարկվեց հնարավորության դեպքում ծրագիրը Արցախում եւս իրականացնելու հարցը։
ՀՀ Առողջապահության նախարարություն
