Կոմիտաս 5 հասցեի բնակիչ Սուսաննա Պալյանը այսօր Երեւանի քաղաքապետարանի դիմաց պատմեց, որ իրենց ձեռքի տակ ունեն ապացույցներ, թե ինչպես է գլխավոր ճարտարապետ Տիգրան Բարսեղյանը սպառնում երեւանցիներին:
«Եթե հրապարակենք այն նյութերը, որտեղ գլխավոր ճարտարապետը խոսում է բնակիչների հետ, նա ուղղակի սպառնում է բոլոր երեւանցիներին, որ բոլորը պատրաստ լինեն, որ Երեւանը կառուցապատվելու է ավելի խտացնելու են շինությունները: Սա սպառնալիք էր գլխավոր ճարտարապետի կողմից: Սա չենք հրապարակում, որովհետեւ խնդրել են, որ չհրապարակենք, խոսակցությունը մնա փակ: Ունենք ձայնագրությունը, ունենք փաստաթղթերը, ուղղակի խայտառակություն է, եթե հրապարակենք, այդ մարդուն ուղղակի պետք է հեռացնեն աշխատանքից»,- ասաց բնակիչը:
Նա նաեւ առաջարկեց, իրենց շենքերի դիմաց կառուցվող 7 հարկանի շենքի կառուցումը տեղափոխեն քաղաքապետարանի դիմաց. «Եթե վաճառել են այդ հողակտորը եւ մեզ ասում են՝ պետք է տուժեք, գլխավոր ճարտարապետն էլ ասում էր՝ ոչինչ անտառում չեք ապրում, կարող եմ առաջարկել, որ շենքի կառուցումը տեղափոխեն այստեղ: Քաղաքապետարանի դիմաց կա տարածք: Քեշիշ Աբրահամը թող գա եւ կառուցի այստեղ, այս փողոցն էլ փակի ու կառուցի ոչ թե 7 հարկանի, այլ 14 հարկանի շենք, որ Տարոն Մարգարյանը բացի իր պատուհանները եւ տեսնի գեղեցիկ մի շինություն, որ մեզ ասում են՝ գեղեցիկ շենք են կառուցում: Եթե նա սիրում է կանաչ տարածք, մենք ավելի շատ ենք սիրում եւ ուզում ենք՝ այդ կանաչապատ տարածքը լինի մեր շենքի դիմաց»:
Բնակիչը նաեւ վստահեցրեց, որ առանց Կոմիտաս 5 հասցեի բնակիչների համաձայնության այնտեղ ոչ մի շինություն չի կառուցվելու. «Ուզում եմ նախօրոք ասենք, որ չտանջվեն, չնախագծեն ինչ-որ նախագծեր: Հիմա նախագծերն անընդհատ փոփոխում են, փոքրացնում են, լայնացնում են: Մեկ է բնակչությունը չի համաձայնելու ոչ մի նախագծի, իզուր թող չտանջվեն, ժամանակ չվատնեն»:
Կարդացեք նաև
Արփինե ՍԻՄՈՆՅԱՆ
