«Երեւան Ջուր» ընկերությունը սկսել է մայրաքաղաքի անձրատար համակարգի մաքրման հերթական աշխատանքները:
Գործող կարգի համաձայն, տարին երկու անգամ՝ գարնանն ու աշնանը, իսկ առավել «խոցելի» վայրերում` ավելի հաճախակի, ընկերության «Արեւելք» եւ «Արեւմուտք» շահագործման տնօրինությունների տարածքային տեղամասերը մաքրում են` նաեւ բարձր ճնշման օդ փչող հատուկ մեքենաների օգնությամբ, կուտակված աղբից ինչպես փողոցների անձրեւընդունիչների դիտահորերը, այնպես էլ` դրանցից դեպի կոյուղու կոլեկտորներ ձգվող խողովակաշարերը: Ընդ որում, անձրեւընդունիչների վնասված թուջե ցանցերի փոխարեն տեղադրվում են նորերը: Նշված աշխատանքները կատարվում են անձրեւային եղանակներին ընդհառաջ՝ կանխարգելիչ նկատառումներով, անձրեւաջրերի կուտակումներից խուսափելու եւ դրանց անխափան հեռացումն ապահովելու նպատակով:
Ինչպես տեղեկացրեց ընկերության «Կենտրոն» շահագործման տեղամասի գլխավոր ճարտարագետ Արթուր Զակեոսյանը, մայրաքաղաքի կենտրոնում անձրեւընդունիչները մաքրվում են ինչպես փողոցներում, այնպես էլ ստորգետնյա անցումներում: Վերջին դեպքում՝ ճանապահային ոստիկանության հետ համագործակցությամբ: Մասնավորապես, արդեն մաքրվել են անձրեւընդունիչները Մաշտոցի պողոտայի, Խանջյան փողոցի եւ Աբովյան փողոց-Մյասնիկյան պողոտա անցումներում:
Ընկերության շահագործման տեղամասերը անում են հնարավորինս աշխատանքները սեղմ ժամկետներում ավարտելու համար:
«Երեւան Ջուր» ՓԲԸ հաղորդակցության բաժին
