Վերջին շրջանում ՀՀ վաստակավոր արտիստ, Ազգային օպերային թատրոնի երաժշտական ղեկավար եւ գլխավոր դիրիժոր Կարեն Դուրգարյանի հաճախակի հյուրախաղերի շրջագայությունները տարբեր խոսակցությունների առիթ են դարձել։ Սկսած 2000-ականների սկզբից, դրանք իսկապես հաճախակի են։ 2001թ. հայ դիրիժորը Իտալիայում հանդես է եկել Հայդնի սիմֆոնիաների մեկնաբանմամբ, ապա Կալյարիի թատրոնում՝ Չայկովսկու «Օպրիչնիկ» օպերային ներկայացման բեմադրական աշխատանքներում արվեստագետը հանդիսացել է մեծանուն դիրիժոր Գենադի Ռոժդեստվենսկու ասիստենտը։ Իսկ «Օպրիչնիկի» առաջնախաղային երկու ներկայացումները ղեկավարել են ե՛ւ Ռոժդեստվենսկին, ե՛ւ Դուրգարյանը։ Այնուհետեւ մեր դիրիժորը տարբեր օպերաներ ղեկավարելու նպատակով հրավիրվել է եվրոպական ճանաչված թատրոններ, այդ թվում՝ «Կոլիզեյ», «Լա Ֆենիչի», Տուրինի, Լիսաբոնի թատրոններ։
Դիրիժոր Դուրգարյանը 2010-ից ցանկալի հյուր է Սանկտ Պետերբուրգի Մարիինյան թատրոնում, ինչը սկսվեց խորեոգրաֆ Վյաչեսլավ Խոմյակովի եւ Կարեն Դուրգարյանի համատեղ՝ Խաչատրյանի «Սպարտակ» բալետի բեմադրական աշխատանքներով։
Ժամանակին Դուրգարյանը «Առավոտին» հայտնել էր, թե Մարիինյան թատրոնի 2013-14 թթ. խաղաշրջանում ինքն ունի հրավեր՝ վարելու Վերդիի «Բոհեմ», «Պարահանդես-դիմակահանդես» եւ Պուչինիի «Տոսկա» ներկայացումները։
Նախօրեին դիրիժորը մեզ ասաց, որ մեկնում է Սանկտ Պետերբուրգ՝ Վերդիի «Պարահանդես-դիմակահանդեսը» ղեկավարելու։ Կես կատակ-կես լուրջ հարցին, թե՝ Մարիինյանը հայ դիրիժորի համար կարծես դարձել է հարազատ տուն, Դուրգարյանը հակադարձեց. «Հարազատ տունս Երեւանի օպերային թատրոնն է»։
Կարդացեք նաև
Ըստ մեր տեղեկությունների, Մարիինյան թատրոնի «Պարահանդես-դիմակահանդեսին» ներկա է գտնվելու նաեւ ՀՀ վարչապետ Տիգրան Սարգսյանը։ Այս առիթով վարչապետի մամուլի քարտուղար Հարություն Բերբերյանը մեզ փոխանցեց. «Սեպտեմբերի 29-ից հոկտեմբերի 1-ը վարչապետի գլխավորած պատվիրակությունը Սանկտ Պետերբուրգում մասնակցելու է հայ-ռուսական միջպետական հանձնաժողովի աշխատանքներին, որի շրջանակներում նախատեսված է Մարիինյան թատրոնում Վերդիի «Պարահանդես-դիմակահանդես» օպերային ներկայացման դիտումը»։
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
