«Ամեն կողմից հարցնում են՝ ո՞ւր է մտավորականությունը: Այսօր, կարելի է ասել, առաջին անգամ մտավորականությունը հավաքվել է: Երկրում տիրող իրավիճակն՝ ամենաթողությունը, անպատասխանատվությունն է ստիպել մեզ հավաքվել»,- հայտարարեց գրող, հրապարակախոս Բակուր Կարապետյանը սեպտեմբերի 27-ին Գրողների տանը կայացած մտավորականների հավաքի ժամանակ: Հավաքի օրակարգը կազմված էր երկու կետից՝ «Ամեն հայի տուն՝ փոքրիկ Հայաստան» ծրագրի հայեցակարգի քննարկումը և քաղաքական վերնախավի սերնդափոխությունը:
Հավաքի ժամանակ Բակուր Կարապետյանը նշեց, որ նույնիսկ Լևոն Անանյանն էր ոգևորվել իր նախաձեռնությամբ և պատրաստվում էր մասնակցել հավաքին: Գրողի խոսքերով քաղաքացիական նախաձեռնության նպատակն է ունենալ առավել հայեցի ընտանիքներ Հայաստանի Հանրապետությունում, Լեռնային Ղարաբաղում և սփյուռքում.
«Մենք մի ժողովուրդ ենք, որ ցրված ենք աշխարհի մեջ, բայց եթե խելոք գտնվեինք կօգտագործեինք տեխնիկական միջոցները, ապա դա առավելություն կլիներ: Մենք պետք է ընտանիքները դարձնենք փոքրիկ Հայաստան և հենց այդ «փոքրիկ Հայաստանների» միությունը դառնա ազգ-պետություն»:
Հավաքի ներկա մտավորականները Բակուր Կարապետյանին առաջարկեցին կենտրոնանալ Հայաստանի վրա, նամանավանդ, սահմանամերձ գյուղերի, քանի որ ըստ նրանց հիմա մարդիկ արտագաղթում են երկրի իշխանության պատճառով, իսկ Լեռնային Ղարաբաղն էլ ունի ինքնավար պետության կարգավիճակ: «Ազգային համաձայնություն» կուսակցության նախագահ Արամ Հարությունյանը նշեց, որ բոլորն էլ տեղյակ են և՛ազատամարտիկների, և՛ սահմանամերձ գյուղերի խնդիրներից.
Կարդացեք նաև
«Ես ուզում եմ, որ ո՛չ մտավորականը, ո՛չ գիտնականը չդառնա ընտանի կենդանի: Էսօր էս իշխանությունը ինչ անում է, անում է հայաթափելու նպատակով: Եթե հանրապետության նախագահը գնում է Լֆիկ Սամոյի ավտոյի մաղարիչի քեֆին, վե՜րջ, չկա տենց բան, էլ իրեն նամակներ մի՛ գրեք»:
Ամի ՉԻՉԱԿՅԱՆ
