«700 աշխատանքի տեղ կբացվի եւ 700 ընտանիք կապրի: Ինքնաթիռներն ու գնացքներն էլ, որոնք միլիոնից ավելի մարդ են տանում երկրից, էլ չեն տանի»,- այսօր «Ծածկած շուկայի» դիմաց ակցիայի ժամանակ անընդհատ կրկնում էին ԱԺ պատգամավոր Սամվել Ալեքսանյանի պաշտպանները:
Նրանք նոր ասելիք չունեին, այսօր էլ պնդում էին, որ շուկան քանդվում էր ու բարերար Ալեքսանյանը փրկեց պատմամշակութային հուշարձան-շուկան:
Լրագրողներից մեկի դիտարկմանը, թե ոչ ոք չի ասում շուկան պետք չէր նորոգել, բայց պետք էր հուշարձանը պահպանել, Ալեքսանյանի թիմակիցներից մի երիտասարդ, սկսեց հեգնել. «Քուրս հուշարձանի ի՞նչն ա քանդված: Քանի՞ տարեկան ես, երեւի 25 տարեկան չկաս, տո դու 5 անգամ էս շուկան մտած կա՞ս: Տո լսել ա էս երեխեն, սկի չի էլ իմանում ի՞նչ հարց ա տալի: Միկրոֆոն ա ձեռը պահել, գիտի արդեն լրագրող ա դառել: Հերթապահ մասում լավ կաշխատի էդ երեխեն, որպես քննիչ»:
Հետո երգչախմբի համաչափ նվագակցությամբ հավաքված կանայք սկսեցին կրկին վանկարկել Ալեքսանյան բարերար, Ալեքսանյան շինարար ու փառք ու պատիվ տվեցին նրան:
Կարդացեք նաև
«Փառք ու պատիվ բարերարին, նորոգում ա, սարքում ա, հանրային զուգարան էր»:
Հավաքվածները նաեւ հերքեցին իրենց հավաքվելու համար պատգամավորից գումար ստանալու մասին խոսակցությունները. «Ալեքսանյանը ոչ մեկից ոչինչ չի պահանջում, ոչ ոքի չի կաշառում»:
Իսկ շուկայի հարակից շենքի բնակիչ ներկայացող միր մարդ էլ հավելեց. «Սամվել Ալեքսանյանը բոլորին կաշառում ա: Ինչի՞ համար ա կաշառում, որ այ սենց գեղեցիկ կոթող ա սարքում ժողովրդի համար: Ամեն մեկը թող սենց կաշառի մեզ, մենք այ սենց ուրախ կլինենք»:
Մանրամասները՝ շուտով տեսանյութում:
Արփինե ՍԻՄՈՆՅԱՆ
