Հանրային մի շարք կառույցների նախաձեռնությամբ՝ քաղաքացիական հասարակությանը, հանրային ակտիվությանը վերաբերող հարցերով պարբերաբար քննարկումներ են կազմակերպվում ՀՀ ԱԺ մշտական հանձնաժողովների, խմբակցությունների, ՀՀ կառավարության, նախարարությունների պաշտոնյաների, միջազգային և տեղական կազմակերպությունների ներկայացուցիչների հետ:
Aravot.am-ը այս ծրագրում ներգրավված «Արազա» ԲՀԿ նախագահ Թամարա Աբրահամյանի հետ զրույցում հետաքրքրվեց`ԱԺ պատգամավորին, որը երբևէ իր աշխատասենյակի դուռը չի բացել, կամ վիրավորում է լրագրողին, արդյոք կարո՞ղ է հասու լինել քաղաքացիական հասարակություն հասկացությունը: Նա պատասխանեց. «Մենք փորձում ենք բոլորին հասցնել, մեր ամսագիրը բոլոր պատգամավորներին ուղարկում ենք, բայց չենք կարող նրանց կարդալ պարտադրել»: Տիկին Աբրահամյանը նշեց, որ երբեմն դա անում են ԱԺ հանձնաժողովների լսումների, ընդմիջումների ժամանակ:
Իսկ որ պատգամավորը լրագրողին վիրավորում է, Թամարա Աբրահամյանը կարծում է, որ նա պիտի գրավոր դժգոհություն ներկայացնի, դիմի դատական ատյաններ, և պարտադիր չէ վիրավորանքին վիրավորանքով պատասխանել, կամ պիկետ ու ցույց անել:
Հետաքրքրվեցինք` շփումներն ի՞նչ են ցույց տալիս, մեր պատգամավորների մեծամասնությունը պատկերացնո՞ւմ է`ինչ ասել է քաղաքացիական հասարակություն: Թամարա Աբրահամյանը պատասխանեց. «Մեզնից յուրաքանչյուրը դա հասկանում է իր իրազեկվածության և իրավագիտակցության հարթությունից: Այդ համատեքստում սուբյեկտիվ ընկալումներ էլ ունենք: Շատերը քաղաքացիական հասարակությունը դեռ ընկալում են բարեգործության մակարդակի, որ ՀԿ-ն ընդամենը բարեգործությամբ պիտի զբաղվի: Կան երիտասարդ պատգամավորներ, որոնք որոշակի պատկերացումներ ունեն այդ մասին, քանի որ մուտքուելք են անում Գերմանիայի Բունդեսթագ և բնականաբար իրենց համար քաղաքացիական հասարակություն հասկացությունն ավելի տեսանելի է»:
Կարդացեք նաև
Սակայն, միևնույն ժամանակ մեր զրուցակիցը նշեց, որ պատգամավորների այն հատվածը, որը քաղաքացիական հասարակության հետ աշխատանքում ակտիվ ու պրոակտիվ է, ավելի քիչ են, քան իներտները, որոնք դա համարում են ավելորդ աշխատածավալ ու գլխացավանք:
Ըստ մեր զրուցակցի`կուսակցական պատկանելությունը ևս կաշկանդում է պատգամավորներին. «ԱԺ-ում կուսակցական պատկանելություն ունեցող պատգամավորները մեծամասնություն են կազմում: Նրանք նախաձեռնող լինելու սահմանափակ հնարավորություններ ունեն: Իրենք դա պիտի համաձայնեցնեն խմբակցության հետ, ինչը բացասաբար է անդրադառնում քաղաքացիական հասարակության հետ իրենց ակտիվ մասնակցությանը»:
Տաթև ՀԱՐՈՒԹՅՈՒՆՅԱՆ
