«Անմեղության կանխավարկածից» ելնելով՝ ՀԱԿ խմբակցության ղեկավար Լեւոն Զուրաբյանը չի կարող ասել, թե ինչպիսի գլխավոր դատախազ կդառնա Գեւորգ Կոստանյանը, ում նշանակումը նա համարում է արդեն որոշված. «Մենք պատրանքներ չունենք, եւ հստակ է, որ նա կնշանակվի այդ պաշտոնում»: Այս մասին նա ասաց այսօր՝ ՀԱԿ-ում ՀՀ գլխավոր դատախազի թեկնածու Գեւորգ Կոստանյանի հետ հանդիպումից անմիջապես հետո:
Հիշեցնենք, որ գլխավոր դատախազի թեկնածուն այսօր հանդիպում է ԱԺ խմբակցությունների հետ: Իսկ առաջիկա քառօրյայում ԱԺ-ն պետք է քննարկի եւ քվեարկի ՀՀ նախագահի առաջարկը՝ այդ պաշտոնում պարոն Կոստանյանին նշանակելու մասին:
Ու չնայած «այս բռնապետական համակարգում, երկրի բռնապետ ղեկավարի պայմաններում» , ըստ պարոն Զուրաբյանի, անկախ նրանից, թե ով կնշանակվի այդ պաշտոնում, քիչ է հավանական, որ որեւէ բան կփոխվի, այդուհանդերձ, պարոն Զուրաբյանը համարում է, որ պետք է պարոն Կոստանյանին ժամանակ տալ՝ իրենց բարձրացրած հարցերի լուծման համար, հատկապես լսելով իր մոտեցումները եւ աշխատելու պատրաստակամությունը: «Ճիշտ չէր լինի, եթե մենք նրան այդ ժամանակը չտայինք»,-ասաց ՀԱԿ խմբակցության ղեկավարը, սակայն նկատեց, որ դեռ խմբակցությունում չի քննարկվել եւ պարզ չի, թե ինչպես կքվեարկի իրենց խմբակցությունը Գեւորգ Կոստանյանի նշանակման վերաբերյալ:
Լեւոն Զուրաբյանը համարում է, որ Գեւորգ Կոստանյանը «բոլոր առումով եւ որակներով, ավելի ընդունելի է, քան Աղվան Հովսեփյանը» , թեեւ նորից կրկնեց, որ «այս միջավայրում նա չի կարող իրեն դրսեւորել որպես օրինականության պահապան»:
Կարդացեք նաև
ՀԱԿ-ը գլխավոր դատախազի թեկնածուի առջեւ բարձրացրել է մի քանի հարցեր, որոնց Գեւորգ Կոստանյանը, Լեւոն Զուրաբյանի բնորոշմամբ՝ լինելով «լավ իրավաբան», ընդամենը պատասխանել է, որ դեռ պետք է ուսումնասիրի այդ հարցերը, քանի որ դրանցից տեղյակ է միայն մամուլից:
Իսկ հարցերը եղել են բազմազան՝ Մարտի 1, դրան հետեւած անօրինական դատավարություններ, քաղբանտարկյալ Տիգրան Առաքելյան, ՍԴՀԿ-Լյուդմիլա Սարգսյան դատավարական թնջուկ, կոռուպցիա եւ մասնավորապես՝ օֆշորային սկանդալն ու ԴԱՀԿ ղեկավարի հետ կապված կոռուպցիոն հարցեր եւ այլն:
ՀԱԿ խմբակցության հետ հանդիպումից հետո պարոն Կոստանյանը շտապեց հանդիպելու ԲՀԿ խմբակցության հետ:
Մելանյա ԲԱՐՍԵՂՅԱՆ
