Ինչպես հայտնի է` երեկ Մեղրի-Երևան ավտոճանապարհին միջադեպ էր տեղի ունեցել «Ժառանգության» ներկայացուցիչների և ռուս սահմանապահների միջև: Վերջիններս արգելել էին «Ժառանգության» երկու մեքենաների ուղևորների ազատ տեղաշարժվել ու կոտրել էին Զարուհի Փոստանջյանի տեսախցիկը, իսկ այս թիմը մեկնել էր Սյունիք ` քարոզչության և հետ էր վերադառնում Մեղրիից:
Այսօր «Ժառանգության» առաջնորդ Րաֆֆի Հովհաննիսյանը գնահատելով այս միջադեպը, իր կասկածները հայտնեց, որ ՀՀ իշխանություններն ու Սյունիքի պատգամավորի ՀՀԿ-ական թեկնածուն այս ամենի մասին կանխավ իմացել են:
«Սամվել Հայրապետյանից ու Զարուհի Փոստանջյանից իմացանք, որ առանց որևէ հիմնավորման մեր մեքենաները, որոնք քարոզարշավի մեջ են` օրենքին համապատասխան, խուզարկության են ենթարկվել սահմանապահ զորքերի, տվյալ դեպքում հենց ФСБ-ի ծառայության կողմից, այսինքն՝ տվյալ դեպքում օտար երկրի գործակալության կողմից: Ես չեմ բացառում, որ չընտրված իշխանությունները, նաև Հանրապետական կուսակցության թեկնածուն տեղյակ լինեն այս ամեն ինչից: Մենք բացատրություն են պահանջում, բայց մեզ համար նորություն չէ, այս վիճակի մեջ պայքարում ենք երկար-երկար տարիներ: Սա է ընդգծում նաև հրամայականը, որ հայ մարդը, տվյալ դեպքում սյունեցին պայքարի ազատվելու ստրկամտությունից և վախի ճիրաններից: Դատապարտում ենք և նաև բացատրություն պահանջում թե պաշտոնապես չընտրված իշխանություններից և թե Ռուսաստանի իշխանություններից, թե ինչպես կարող են հայրենի հողի վրա` առանց հիմնավորման, թեկնածուին կանգնեցնել, ո՞րն էր դրա նպատակը», -ասաց Րաֆֆի Հովհաննիսյանը:
Նունե ԱՐԵՎՇԱՏՅԱՆ
