«Պետք է սկսել դատավարությունների շարք՝ մեր պապերի թողած անշարժ գույքը օրինական կարգով վերադարձնելու համար: Բնականաբար, խնդիրներ կլինեն, բնականաբար, դժվարություններ կլինեն, եւ գուցե թուրքական դատական ատյանները չկայացնեն այդ վճիռները, բայց սպառելով ներպետական արդարադատական աստիճանները, կարելի է հասնել Մարդու իրավունքների եվրոպական դատարան եւ հաղթել»,- այսօր «Հայնյուզ» ակումբում ասաց «Մոդուս վիվենդի» կենտրոնի ղեկավար Արա Պապյանը:
Նա վստահ է, որ այդ գործընթացին պետք է մեծ թափ տալ, եւ դրանով կշահեն ոչ միայն Ցեղասպանության զոհերի եւ Ցեղասպանության հետեւանքով հայրենազրկվածների ժառանգները, այլեւ՝ մեր պետությունը, եթե որոշակի մասնակցություն ունենա այս գործընթացին:
Որպես օրինակ նա բերեց Իսրայելի փորձը, երբ Արեւելյան Եվրոպայում իրենց թողած սեփականությունը ետ վերադարձնելու համար դատական պայքարում ձեռք բերած շահույթը բաժանվում է 33/33/34 հարաբերակցությամբ՝ սեփականատիրոջը, փաստաբանին եւ Ւսրայել պետությանը: Ասաց նաեւ, որ երեք տարի առաջ մասնակցել է Ժնեւում կայացած մի փակ հանդիպման, որի ժամանակ հանդիպել է Իսրայելի ամենահայտնի իրավաբաններից մեկի հետ, որը հաջողությամբ զբաղվել է այդ գործընթացներով եւ պատրաստակամություն հայտնել նույնը անել նաեւ հայերի համար: «Երեւանցի տղա է՝ հոր կողմից հայ, մոր կողմից՝ հրեա, ասաց, որ վերջին 20 տարում Իսրայելը՝ նման դատական հայցերի շնորհիվ Լեհաստանից, Չեխիայից, Սլովակիայից, Հունգարիայից, Ռումինիայից եւ այլ երկրներից մոտ 4 մլրդ դոլար է ստացել: Եվ ասաց, որ պատրաստ ենք ստանձնել այդ գործը նաեւ հայերի համար, բայց անհրաժեշտ է, որ լինեն արխիվային ամբողջ փաստաթղթերը»:
Մելանյա ԲԱՐՍԵՂՅԱՆ
