Այսօր «Ուրբաթ» ակումբում Կանադայի խորհրդարանի անդամ Ստեֆան Դիոնն անդրադարձավ հայ-կանադական հարաբերություններին եւ իր այցելությանը` Հայաստան ու Արցախ։ Սեպտեմբերի 21-ին աշխատանքային այցով Երեւան ժամանած Ստեֆան Դիոնի այցը կազմակերպվել է Հայ դատի Կանադայի հանձնախմբի` Կանադայում ՀՀ դեսպանատան եւ ԼՂՀ ներկայացուցչության հետ միասին: Ստեֆան Դիոնը ծանոթացել է Արցախի իրականությանը, աջակցել հայ-կանադական հարաբերությունների սերտացմանը, ինչպես նաեւ ծանոթացել սիրիահայերի խնդիրներին` դրանց լուծմանը Կանադայի աջակցությունն ապահովելու նպատակով:
Տեղեկացնենք նաեւ, որ Ստեֆան Դիոնին ընդունել են մի շարք պաշտոնատար անձինք:
«Ես հնարավորություն ունեցա տեղում ծանոթանալ փախստականների խնդիրներին ու նաեւ ծանոթացա, թե ինչպես է կառավարվում Լեռնային Ղարաբաղը»,- ասաց Ստեֆան Դիոնը:
Ստեֆան Դիոնը տեղեկացրեց, որ Կանադան շատ մտահոգ է սիրիական տագնապով, իսկ ինչ վերաբերվում է տուժածներին ցուցաբերվելիք օգնությանը, ապա նշեց` «Ես հանդիպելով փախստականների եւ Սփյուռքի նախարարի հետ առաջարկներ եմ ստացել այն մասին, թե ինչ կարող է անել Կանադան նրանց օգնելու համար: Բայց հիմա չեմ կարող խոսել այդ մասին, քանի որ պետք է վերադառնամ Կանադա ու քննարկենք այդ հարցերը: Կանադան մոտիկից հետեւում է այդ բոլոր իրադարձություններին, ու նաեւ շատ մտահոգ է քիմիական զենքի կիրառման փաստի առիթով»:
Կարդացեք նաև
Ստեֆան Դիոնը նաեւ նշեց, որ հայ-կանադական հարաբերությունները շատ լավ են ու դեսպանատուն բացելը Երեւանում` էլ ավելի կնպաստի այդ հարաբերություններն, ու մարդիկ այցի համար ստիպված չեն լինի գնալ Մոսկվա:
Եվա ՀԱԿՈԲՅԱՆ
